MİLLİ TƏHLÜKƏSİZLİK NAZİRLİYİ MƏTBUAT XİDMƏTİNİN MƏLUMATI
Milli Təhlükəsizlik Nazirliyinin bu il yanvar ayının 16-da kütləvi informasiya vasitələri ilə yayılmış bəyanatında bildirilirdi ki, son aylar radikal müxalifəti təmsil edən bir sıra mətbuat orqanlarında, xüsusilə də “Yeni Müsavat” və “Hürriyyət” qəzetlərində PKK terrorçu təşkilatının respublikada guya geniş fəaliyyət göstərdiyi əsasız olaraq iddia edilir, dünyada antiterror koalisiyasının fəal üzvü kimi tanınan Azərbaycan, əslində, terroru dəstəkləyən ölkə kimi təbliğ edilir. Nazirlik həmin destruktiv qüvvələrin əməllərini antiazərbaycan fəaliyyəti kimi qiymətləndirmiş və belə hallara qarşı qanun çərçivəsində barışmaz mübarizə aparılacağını bəyan etmişdi.
Ötən vaxt ərzində nazirliyin İstintaq şöbəsi tərəfindən aparılmış araşdırmalar əsasında “Yeni Müsavat” qəzetinin baş redaktoru Rauf Arifoğluna rəsmi sorğu göndərilmişdir. Sorğuda deyilir:
“Yeni Müsavat” qəzetinin 12 yanvar 2003-cü il tarixli 10 (1937)-cu nömrəsində “Abdolbari Güzel Türkiyəyə istintaqa çağırılıb”, “Azərbaycandakı xarici iş adamlarının kimliyi araşdırılmalıdır”, 18 yanvar 2003-cü il tarixli 16 (1943)-cı nömrəsində “Siyəzəndə PKK izi”, “PKK məsələsi” sərlövhəli məqalələrdə: “... söhbət konkret sənədlərdə təsbit olunmuş cinayət əməllərindən, Azərbaycanda türk dünyasının və Türkiyənin əleyhinə yönəlmiş fəaliyyətdən gedirsə, ermənilərlə və başqa terrorçu təşkilatlarla qaranlıq əlaqələr barədə məlumat varsa, belə yerdə “Yeni Müsavat” susa bilməz”, “... ayrı-ayrı ölkələrdə fəaliyyət göstən və PKK-nı maliyyələşdirən ayrı-ayrı iş adamları Bakıya gəlirlər. Onlar Azərbaycan türkünün haqqından, cibindən kəsilənləri terrorçu təşkilatlata ötürürlər”, “Siyəzən broyler”in rəhbərlərinin PKK ilə maliyyə əlaqələrində olması barədə xeyli faktlar var”, “...ölkəmizdə “Siyəzən broyler” fabriki kimi gözdən uzaq elə müəssisələr var ki, onların fəaliyyətini PKK-çılar həyata keçirir. PKK-nın Azərbaycandakı biznesindən qazandığı pullar milyonlarla ölçülür”, “...PKK mənsublarının Azərbaycanda müxtəlif orqanların himayəsi altında pasport aldıqları barədə bir neçə fakt var”, “...PKK-nın ölkəmizdə mövcud olmasını təsdiqləyən faktlar var” - kimi iddialar əks etdirilmişdir. Belə mülahizələr qəzetin digər saylarında verilmiş yazılarda da təkrar olunur”.
Nazirliyin sorğusunda daha sonra bildirilir: “Azərbaycan Respublikası Cinayət Məcəlləsinin 214-1-ci maddəsinə görə, pul vəsaitlərinin və ya digər əmlakın tamamilə və yaxud qismən, bilavasitə və ya dolayısı ilə terrorçuluğun törədilməsinə qəsdən yönəldilməsi və ya pul vəsaitlərinin və ya digər əmlakın qəsdən həmin məqsədlə toplanılması ağır cinayət hesab olunur. Azərbaycan Respublikası Cinayət-Prosessual Məcəlləsinin 206.1-ci maddəsinə əsasən, cinayətin törədilməsi və ya onun törədilməsinə hazırlıq faktına dair müvafiq kütləvi informasiya vasitəsinə məlum olmuş, cinayət işinin başlanması üçün səbəb hesab edilən kütləvi informasiya vasitələrinin məlumatları mətbuatda əks etdirildikdən sonra cinayət təqibi orqanlarına göndərilməlidir. Həmin məcəllənin 206.3-cü maddəsinə əsasən, törədilmiş və ya hazırlanan cinayətlər haqqında məlumatları dərc etmiş kütləvi informasiya vasitələrinin vəzifəli şəxsləri, habelə həmin məlumatların müəllifləri onlarda olan və cinayət haqqında məlumatı təsdiq edən sənədləri təhqiqatçiya, müstəntiqə, prokurora və ya məhkəməyə təqdim etməlidir.
Belə cinayətlərin araşdırılması qanunvericiliyə əsasən MTN-in səlahiyyətlərinə aid edildiyi üçün nazirliyin İstintaq şöbəsində həmin yazılarla bağlı ilkin yoxlama aparılır”.
Göstərilənləri nəzərə alaraq, “Yeni Müsavat” qəzetinin rəhbərliyinə təklif olunmuşdur ki, terrorçu PKK təşkilatının maliyyələşdirilməsi ilə bağlı yazıların, bu yazılarda dərc edilən məlumatları təsdiq edən sənədlərin, müsahibələrin lent yazlarının, habelə dərc edilməmiş əlavə faktların Azərbaycan Respublikası MTN-in İstintaq şöbəsinə göndərilməsini təmin etsin.
Analoji sorğular “Hürriyyət” qəzetinin baş redaktoru Aydın Quliyevə və millət vəkili İqbal Ağazadəyə də göndərilmişdir.
Nazirliyin İstintaq şöbəsi sorğu göndərdiyi şəxsləri Azərbaycan Respublikası Cinayət Məcəlləsinin müvafiq maddələrinə əsasən, ağır cinayət haqqında bilə-bilə yalan xəbərçiliyə, habelə xəbər verməməyə görə məsuliyyət barədə xəbərdar etmişdir.
Bölmənin digər xəbərləri
