Bakı, 4 noyabr, AZƏRTAC

Noyabrın 4-də Mingəçevir Dövlət Universitetində (MDU) 8 Noyabr - Zəfər Gününə həsr olunan “Vətən müharibəsi: qalibiyyətin təntənəsi və doğma Qarabağın dirçəlişi” mövzusunda konfrans keçirilib.

Universitetdən AZƏRTAC-a bildiriblər ki, MDU-nun inzibati və akademik heyət üzvləri, tələbə və magistrantlarının iştirakı ilə “Zoom” platforması üzərindən onlayn formatda təşkil olunan konfransda Milli Məclisin Elm və təhsil komitəsinin sədri Bəxtiyar Əliyev, deputatlar Ceyhun Məmmədov və Vüqar Bayramov çıxış ediblər.

Konfransı açan MDU-nun rektoru Ş.Bayramov Müzəffər Ali Baş Komandanımız İlham Əliyevin rəhbərliyi və rəşadətli Azərbaycan Silahlı Qüvvələrinin qəhrəmanlığı sayəsində 44 günlük Vətən müharibəsində qazanılan tarixi Zəfərin birinci ildönümü münasibətilə iştirakçılara təbriklərini çatdırıb.

Şanlı Qələbənin rəmzinə çevrilən “Dəmir yumruq” ilə erməni faşizminin başını əzən, düşmən ordusunun belini qıran və Vətən tarixinin qəhrəmanlıq salnaməsini yazan igid əsgər və zabitlərlə qürur duyduğunu deyən rektor ölkəmizin ərazi bütövlüyünün bərpa edilməsi uğrunda canından və qanından keçən bütün şəhidlərə rəhmət, qazilərə isə şəfa diləyib.

Düşmən işğalından azad edilmiş əzəli torpaqlarımızda Azərbaycan bayrağının qürurla dalğalandığını qeyd edən Ş.Bayramov qalib xalqın qalib Ali Baş Komandanı kimi dövlət başçısının doğma yurdlarımıza səfərlərini böyük sevinc və fəxarət hissi ilə izlədiyini və Qarabağın tezliklə cənnətə çevriləcəyinə əminliyini bildirib.

Milli Məclisin Elm və təhsil komitəsinin sədri Bəxtiyar Əliyev Zəfər Günü münasibətilə konfrans iştirakçılarını təbrik edib, xalqımıza və dövlətimizə daim firavan günlər, yüksəliş və tərəqqi arzulayıb. Tarixi Zəfərin qazanılmasında qəhrəman şəhidlərimizin mühüm pay sahibi olduğunu qeyd edən deputat onların əziz xatirəsinin hər zaman böyük ehtiramla anılacağını və heç zaman unudulmayacağını bildirib.

Müstəqilliyin ilk illərində torpaqlarımızın 20 faizinin işğal edildiyini deyən B.Əliyev Qələbənin təməlində məhz Ümummilli Liderin siyasi hakimiyyətə qayıtdıqdan sonra həyata keçirdiyi, hazırda Prezident İlham Əliyev tərəfindən uğurla davam etdirilən hərtərəfli inkişaf strategiyasının və xalqın iradəsinə uyğun aparılan məqsədyönlü siyasətin dayandığını vurğulayıb. O, dövlətin iqtisadi qüdrəti, effektiv diplomatiyası, müasir güclü ordusu ilə yanaşı, əsgər və zabitlərin şücaətini, informasiya mübarizəsində üstünlüyü, milli birlik və siyasi həmrəyliyi, qardaş Türkiyənin mənəvi dəstəyini möhtəşəm qalibiyyəti şərtləndirən başlıca amillər kimi dəyərləndirib.

Tarixi Zəfərdən sonra bölgədə yaranan yeni reallıqlardan söhbət açan deputat qısa müddət ərzində işğaldan azad edilmiş rayonların sürətli yenidən qurulması və dirçəldilməsi işlərinin aparılmasını dövlətin iqtisadi potensialının gücündən xəbər verdiyini diqqətə çatdırıb.

Əlamətdar gün münasibətilə konfrans iştirakçılarını təbrik edən Milli Məclisin deputatı Ceyhun Məmmədov Vətən müharibəsində qazanılan şanlı Qələbənin Azərbaycan tarixinin ən qürurlu səhifələrini təşkil etdiyini bildirib.

Erməni təcavüzü nəticəsində müstəqilliyin ilk illərində ağır günlər yaşamasına və böyük qurbanlar verməsinə baxmayaraq Azərbaycan xalqının heç zaman sınmadığını və 30 il ərzində doğma yurdlarını unutmadığını qeyd edən C.Məmmədov məhz sarsılmaz xalq-iqtidar-ordu birliyi sayəsində düşmənin mənfur niyyətlərinin puça çıxdığını söyləyib.

Postmüharibə dövründə informasiya mübarizəsinin davam etdiyini vurğulayan deputat Azərbaycan həqiqətlərinin dünyaya çatdırılmasında, erməni vəhşiliyinin ifşa edilməsində ən çox işin ziyalıların üzərinə düşdüyünü bildirib və bu istiqamətdə ali təhsil müəssisələrinin fəallıqlarının daha da artırılmasının zəruriliyindən danışıb.

Zəfər Günü münasibətilə konfrans iştirakçılarına təbriklərini çatdıran Milli Məclisin deputatı Vüqar Bayramov 44 günlük Vətən müharibəsində əldə edilən möhtəşəm qalibiyyəti ölkədə aparılan uzunmüddətli siyasətin nəticəsi kimi dəyərləndirib.

Azərbaycanın siyasi, iqtisadi, hərbi və diplomatik sahədə yüksək hazırlığının müharibənin gedişində özünü müqayisə olunmaz dərəcədə böyük fərqlə göstərdiyini bildirən V.Bayramov hərbi əməliyyatlar başladıqdan sonra qısa müddət ərzində qələbənin qazanılacağına heç kimdə şübhə olmadığını qeyd edib.

İşğaldan azad edilmiş Qarabağ və Şərqi Zəngəzur rayonlarının iqtisadi potensialından danışan deputat bölgənin milli iqtisadiyyata reinteqrasiyası nəticəsində iqtisadi artımın drayverinə, qeyri-neft sektorunun lokomotivinə çevriləcəyini bildirib və artıq beynəlxalq təşkilatların Azərbaycanla bağlı proqnozlarında bu müsbət trendlərin öz əksini tapdığını diqqətə çatdırıb.

Çıxışlar konfrans iştirakçıları tərəfindən böyük maraqla qarşılanıb.

Qeyd edək ki, Vətən müharibəsində qazanılan tarixi Zəfərin birinci ildönümü münasibətilə MDU-da müxtəlif formatlı silsilə tədbirlər keçirilir.