MİQRASİYA PROSESİNƏ DAİR BİRGƏ PROQRAM HƏYATA KEÇİRİLİR
Beynəlxalq Miqrasiya Təşkilatının Azərbaycandakı nümayəndəliyi (BMqTAN) Azərbaycan Hökuməti ilə birgə “Miqrasiyanın idarə olunması üzrə potensialların yaradılması” proqramını həyata keçirir. BMqTAN-dən AZƏRTAC-ın müxbirinə bildirmişlər ki, proqram çərçivəsində miqrasiyanın öyrənilməsi ilə məşğul olan nazirliklərarası analitik işçi qruplar yaradılmışdır. İşçi qruplar miqrasiya siyasəti, qanunvericilik, sərhəd nəzarəti məsələlərini nəzərdən keçirəcəklər, bir sıra qanunvericilik aktlarına əlavə və dəyişikliklər edilməsinə dair Milli Məclisin müvafiq komissiyalarına lazımi tövsiyələr verilmişdir. Bununla da Azərbaycanda miqrasiyanın idarə olunması üzrə mükəmməl sistemin yaradılmasının birinci mərhələsi yekunlaşdırılmışdır. Proqram çərçivəsində yaradılmış sərhəd nəzarət komissiyası sərhədlərin idarə olunmasına və Binə hava limanında sərnişinlərin yoxlanmasına dair müvafiq strukturlara tövsiyələr verir. Vaxtaşırı Böyük Britaniya, Kanada və Hollandiyadan dəvət olunmuş mütəxəssislər sərhədçilərə “Miqrasiyanın idarə olunması” və “Sərhəd keçidi prosedurlarına riayət edilməsi” mövzularında təlimlər keçirlər. Bu günədək 194 sərhədçi təlim keçmiş, 15 sərhədçi isə Polşada birillik təhsil alırlar.
Bölmənin digər xəbərləri
