Misir və İtaliya dizaynerləri Kleopatra və Antonini “həyata qaytarıblar”
Bakı, 22 aprel, AZƏRTAC
Misir və İtaliya dizaynerləri Kleopatra və Antonini “həyata qaytarıblar”. AZƏRTAC “Əl Əhram” qəzetinə istinadla xəbər verir ki, bu il Milanda keçirilən dizayn həftəsi Antoni və Kleopatraya həsr olunub. Dizaynerlər eramızdan əvvəl I əsrdə yaşamış məşhur obrazların birgə həyatının müasir illüstrasiyalarını təqdim ediblər.
“Antoni və Kleopatra” adlı sərgidə memarlıq, dekorasiya və geyim üzrə tanınmış brendlər kraliçə Kleopatra və Qədim Roma sərkərdəsi Mark Antoninin birlikdə yaşadıqları sarayı, bəzək əşyalarını və paltarları təqdim ediblər. Dizayn həftəsi çərçivəsində, həmçinin Misir və İtaliya arasında tarixi əlaqələrin müzakirə edildiyi simpozium təşkil olunub.
Dünyada tanınmış brendlərin məhsullarının təqdim edildiyi Milan Dizayn Həftəsi 1961-ci ildən keçirilir. İlk illərdə yalnız İtaliya mebellərinin nümayiş etdirildiyi bu tədbir sonralar müxtəlif sahələri və ölkələri əhatə edib, multikultural ənənələrin təbliğinə geniş yer ayırıb. COVID-19 pandemiyasından əvvəl Həftə çərçivəsində keçirilən sərgini yarım milyon insan ziyarət edib.
Bölmənin digər xəbərləri
