“MKT-ARAZ” FUTBOL KLUBUNUN YENİ STADİONU İSTİFADƏYƏ VERİLMİŞDİR
Martın 23-də İmişli şəhərində “MKT-Araz” futbol klubunun yeni stadionunun istifadəyə verilməsinə həsr olunmuş mərasim keçirilmişdir. Azərbaycan Prezidenti İlham Əliyev mərasimdə iştirak etmişdir.
Dövlətimizin başçısına və xanımına gül dəstələri təqdim olundu.
Prezident İlham Əliyev stadionun rəsmi açılışını bildirən lenti kəsdi. Futbol klubunun prezidenti İkram Kərimli dövlətimizin başçısına məlumat verərək dedi ki, “MKT-Araz” hazırda güclülər dəstəsində nümunəvi çıxış edir, ölkə kuboku uğrunda yarışda isə 1/2 finala çıxmışdır. Müasir Avropa standartlarına tam cavab verən 8500 yerlik stadion MKT Kommersiya-İstehsalat Şirkətinin vəsaiti hesabına tikilmişdir. Tribunaların hamısının üstü örtülüdür. Yeniyetmə futbolçuların təlim mərkəzi, güləş bölməsi də fəaliyyət göstərir. Tikintidə 200 nəfər işləmiş, 2,5 milyon dollar vəsait xərclənmişdir.
Dövlətimizin başçısı stadionla yaxından tanış oldu, hətta futbol topuna gözəl zərbə vuraraq qapıya yönəltdi, klubun futbolçuları ilə səmimi görüşərək, yeni stadionun açılışı münasibətilə təbrik etdi. Görülən işləri yüksək qiymətləndirən Prezident İlham Əliyev müasir tələblərə cavab verdiyinə görə Azərbaycan futbolunun inkişafında bu klubun da üzərinə vəzifələr düşdüyünü bildirdi, idmançılara uğurlar arzuladı.
Dövlətimizin başçısı futbolçularla xatirə şəkli çəkdirdi, klubun prezidenti Azərbaycan futbolunun inkişafına göstərdiyi qayğıya görə dövlətimizin başçısına minnətdarlığını bildirdi.
Azərbaycan Prezidenti klubun güləş bölməsi ilə də tanış oldu. Klubun iki güləşçisi ölkə birinciliyində qalib gəlmişdir. Dövlətimizin başçısı bu idmançılarla görüşdü, onlara yeni qələbələr arzuladı. Prezident mini futbol üçün yaradılmış şəraitlə də tanış oldu və idmançılara uğurlar dilədi.
X X X
Azərbaycan Prezidenti İlham Əliyev martın 23-də İmişli rayonuna səfərini başa çatdırdıqdan sonra Əli Bayramlı şəhərinə gəldi.
Dövlətimizin başçısı və xanımı əvvəlcə Heydər Əliyev meydanında ulu öndərin abidəsini ziyarət etdilər və gül dəstələri qoydular. Sonra meydanda şəhər ictimaiyyətinin nümayəndələri ilə görüş keçirildi. Prezident İlham Əliyev görüşdə nitq söylədi.
Dövlətimizin başçısı sonra Heydər Əliyev Muzeyinin açılışında iştirak etdi, ümummilli liderimizin adını daşıyan parkla tanış oldu.
Həmin gün Prezident İlham Əliyev Əli Bayramlı şəhərində Qarabağ müharibəsi əlilləri, şəhid ailələri, Böyük Vətən müharibəsi veteranları və Çernobıl əlilləri üçün tikilmiş yaşayış binalarının sakinlərinə orderləri təqdim etdi.
Daha sonra dövlətimizin başçısının iştirakı ilə Əli Bayramlıda Müalicə-Diaqnostika Mərkəzinin təməli qoyuldu.
Bölmənin digər xəbərləri
