MOSKVADA MDB-NİN RABİTƏ İDARƏLƏRİ BAŞÇILARI ŞURASININ İCLASI OLMUŞDUR
Nazir Əli Abbasov AZƏRTAC-ın müxbirinə bildirmişdir ki, MDB dövlətləri rabitə idarələri başçılarının iclasında qarşılıqlı maraq doğuran aktual məsələlərə dair geniş fikir mübadiləsi aparılmışdır. Nazir demişdir: “Bu təşkilat 15 il əvvəl – Sovet İttifaqının dağılmasından sonra rabitənin pozulmasının qarşısını almaq məqsədi ilə yaradılmışdır. İclasda təşkilatın çoxillik fəaliyyətinə yekun vurulmuş, rabitənin inkişafı və qabaqcıl texnologiyaların tətbiqi sahəsində əməkdaşlığın perspektivləri müəyyənləşdirilmişdir. Dünya informasiya məkanına inteqrasiya məqsədi ilə əməkdaşlığın möhkəmləndirilməsi və genişlənsdirilməsi üçün Şura iştirakçılarının fəaliyyətinin strateji istiqamətləri təsdiq edilmişdir. Bu çox vacibdir, çünki təşkilat genişlənir və möhkəmlənir. Şura rabitə və informasiya sahəsində elmi tədqiqat işlərinin siyahısını da təsdiqləmişdir”.
Əli Abbasov əməkdaşlığın inkişafına xüsusi töhfəsinə görə MDB-nin Fəxri fərmanı ilə təltif olunmuşdur. Azərbaycan nümayəndə heyətinin daha 5 üzvü bu qurumun müxtəlif fərmanları ilə mükafatlandırılmışdır.
