MÜDAFİƏ NAZİRLİYİ MƏTBUAT XİDMƏTİNİN MƏLUMATI
Azərbaycan Respublikasının müdafiə naziri general-polkovnik Səfər Əbiyev Rusiya Federasiyasının müdafiə naziri Sergey İvanovun dəvəti ilə sentyabrın 6-dan 8-dək Moskva şəhərində işgüzar səfərdə olmuşdur.
Sentyabrın 7-də general-polkovnik S.Əbiyev naməlum əsgərin məzarını ziyarət etmiş, əklil qoymuşdur. Əklilqoyma mərasimində Azərbaycan Respublikasının dövlət himni ifa olunmuşdur.
Həmin gün Rusiya Federasiyasının müdafiə naziri S.İvanov ilə Azərbaycan Respublikasının müdafiə naziri general-polkovnik S.Əbiyevin təkbətək görüşü olmuşdur. Sonra nümayəndə heyətlərinin geniş tərkibdə görüşü keçirilmişdir.
Rusiya Federasiyasının müdafiə naziri S.İvanov nümayəndə heyətini salamlayaraq demişdir ki, son iki ildə Rusiya-Azərbaycan münasibətləri, o cümlədən müdafiə nazirlikləri arasındakı əlaqələr yüksələn xətlə inkişaf edir. Azərbaycan Respublikası Müdafiə Nazirliyinin nümayəndə heyətinin indiki səfəri əlaqələrimizin inkişafında yeni mərhələ olacaqdır.
General-polkovnik S.Əbiyev səmimi qəbul üçün təşəkkür edərək bildirmişdir ki, bu görüş hər iki dövlətin silahlı qüvvələri üçün əhəmiyyətə malikdir. O demişdir: “Bu gün Azərbaycanın ən böyük problemi işğalçı Ermənistanın zəbt etdiyi torpaqların azad edilməsidir. Biz bu gün də təkrar edirik ki, Dağlıq Qarabağ münaqişəsi postsovet məkanında baş vermiş münaqişələrdən birincisidir və burada separatizmin əsasını qoymuşdur. Onun tezliklə həlli, digər münaqişələrin də həllini tezləşdirər. Biz inanırıq ki, Rusiya Federasiyası bu məsələnin həllində əlindən gələni əsirgəməyəcəkdir. Problem hökmən Azərbaycanın ərazi bütövlüyü çərçivəsində həll ediləcəkdir.
Müstəqil Dövlətlər Birliyinin üzvləri kimi, bizim bir-birimizin qarşısında öhdəliklərimiz vardır. Lakin işğalçı Ermənistanın əməlləri bu öhdəliklərin tam şəkildə yerinə yetirilməsinə maneçilik törədir. Azərbaycan tərəfi bu məsələni MDB Müdafiə Nazirləri Şurasının iclaslarında dönə-dönə qaldırmışdır.
İşğalçı Ermənistanın qeyri-konstruktiv mövqedə durmasının əsas səbəblərindən biri də onun Rusiya Federasiyasından 1 milyard dollarlıq qeyri-qanuni silahlar almasıdır və bu silahların geri qaytarılması haqqında aparılan danışıqların bu vaxta qədər nəticəsiz qalmasıdır”.
Tərəflər Azərbaycan Respublikası və Rusiya Federasiyası müdafiə nazirliklərinin əməkdaşlığa hazır olduqlarını bildirmişlər.
Konkret olaraq, onlar hava hücumundan müdafiə sahəsində komanda məntəqələri səviyyəsində informasiya mübadiləsi aparılmasının mümkünlüyü, Qəbələ RLS-in statusu məsələsinin həlli hərbi texniki-əməkdaşlığın genişləndirilməsinin /hərbi texnikanın istismarı, modernləşdirilməsi və s./ vacibliyi, elmi-tədqiqat və hərbi təhsil sistemi sahəsində əməkdaşlığın gücləndirilməsinin zəruriliyi barədə müzakirələr aparmışlar.
Sonra KİV üçün mətbuat konfransı keçirilmiş, general-polkovnik S.Əbiyev və S.İvanov jurnalistlərin suallarına cavab vermişlər.
Səfər zamanı Müdafiə Nazirliyinin nümayəndə heyəti Azərbaycan Respublikasının Rusiya Federasiyasındakı səfirliyində olmuşdur.
Keçirilən görüşlərdə Azərbaycan Respublikasının Rusiya Federasiyasındakı fövqəladə və səlahiyyətli səfiri Ramiz Rizayev iştirak etmişdir.
Nümayəndə heyəti sentyabrın 8-də Bakıya qayıtmışdır.
Bölmənin digər xəbərləri
