Murtəza Həsənov: Azərbaycanın sərhəd təhlükəsizliyi yüksək səviyyədə təmin olunur
Bakı, 18 avqust, AZƏRTAC
Azərbaycanın milli təhlükəsizliyinin və ərazi bütövlüyünün qorunmasında Sərhəd Qoşunlarının rolu əvəzsizdir.
AZƏRTAC xəbər verir ki, bu barədə Azərbaycan Respublikasının Prezidenti yanında Dövlət İdarəçilik Akademiyasının Siyasi İdarəetmə fakültəsinin dekanı Murtəza Həsənovun “Vətən sərhəddən başlayır... Qürur mənbəyimiz Azərbaycan Sərhəd Mühafizəsi 107 yaşında” adlı məqaləsində bildirilib.
“Yurdumuzu qoruyan Ordumuz qəhrəmanlıq salnaməmizin müəllifidir. Ulu Öndər Heydər Əliyevin müasir Azərbaycan Ordusunun daha da qüdrətlənməsi istiqamətində apardığı islahatları uğurla davam etdirən Prezident İlham Əliyev Ali Baş Komandan kimi sərkərdəlik missiyasını da şərəf və ləyaqətlə yerinə yetirir. Qalib Ordumuz Azərbaycan xalqının qürurudur. Ordumuz xalqımızın qürurunu, milli mənliyini qəhrəmanlığı sayəsində geri qaytarıb. Tarix yazan qəhrəmanlarımız qürur mənbəyimizdir. Azərbaycanın müqəddəs sərhədləri etibarlı əllərdədir”, - deyə məqalədə vurğulanıb.
Həmçinin diqqətə çatdırılıb ki, Azərbaycan Dövlət Sərhəd Xidməti ölkənin milli təhlükəsizliyini və suverenliyini qorumaqda, regional sabitliyin təmin olunmasında və iqtisadi inkişafın dəstəklənməsində əsas rol oynayır. Xidmətin fəaliyyətləri dövlətin sərhəd mühafizəsini təmin edərək, beynəlxalq təhlükəsizliklə bağlı əhəmiyyətli töhfələr verir.
“Azərbaycan Sərhəd Mühafizəsinin çətin və mürəkkəb olduğu qədər də şərəfli inkişaf yolu xəyalların gerçəkləşməsi, mümkün olmayanın reallaşması yoludur. Çünki vaxtilə uzaq və əlçatmaz gələcək kimi qəbul edilən müasir sərhəd mühafizə infrastrukturunun, dövlət sərhədinin mühafizəsində ən yeni döyüş texnikasının və silah-sursatın, müşahidə, aşkaretmə, radiolokasiya sistemlərinin tətbiqi günümüzün reallığıdır. İqlimindən, relyefindən, şəraitindən asılı olmayaraq Vətənimizin quru və su sərhədləri sayıqlıqla qorunur, ölkəmizin sərhəd təhlükəsizliyi yüksək səviyyədə təmin olunur”, - deyə Murtəza Həsənov vurğulayıb.
Məqalədə, eyni zamanda, qeyd olunub ki, Dövlət Sərhəd Xidmətinin Akadеmiyasında müstəqil Azərbaycanın gələcəyini qoruyub saxlaya bilən sağlam düşüncəli, vətənpərvər, xalqını, millətini sevən gənc kursantlar yetişir.
Murtəza Həsənov yazıb ki, Vətən müharibəsi günlərində torpaqlarımızın erməni işğalından azad olunmasında sərhədçilər böyük cəsarət və fədakarlıqla döyüşüblər. Dövlət Sərhəd Xidmətinin 47 hərbi qulluqçusu şəhid olub, 197 nəfər yaralanıb. Döyüş əməliyyatları zamanı şəxsi igidlik nümunəsi göstərmiş 12 sərhədçi (4 nəfəri ölümündən sonra) “Vətən Müharibəsi Qəhrəmanı” adına layiq görülüb, 176 nəfər müxtəlif ordenlərlə, 5203 nəfər isə müxtəlif medallarla təltif olunub.
“Vətən müharibəsi zamanı Qələbənin əldə olunmasında mühüm rolu olan Sərhəd Qoşunlarının fəaliyyəti onu deməyə əsas verir ki, bu qoşun növü keçirilən təlimlər və kurslar, eyni zamanda, qazandığı döyüş bacarıqları sayəsində qarşıya qoyulan tapşırıqları sürətlə və yüksək dəqiqliklə icra etmək qabiliyyətinə malikdir. “Ölsəm şəhidəm, qalsam qaziyəm”, - deyən bir xalqın, “Şəhidlik əsgərin son rütbəsidir”, - söyləyən Vətən oğullarının qarşısına çıxacaq heç bir güc yoxdur. Azərbaycanın müstəqil dövlət quruculuğunun bütün sahələrində, o cümlədən hərbi təhlükəsizliyinin təmin edilməsi sahəsində gördüyü əzəmətli işlər Ulu Öndər Heydər Əliyevin mahir siyasətçi, böyük təşkilatçı olduğunu bir daha sübut edir. Ümummilli Liderimizin müstəqil Azərbaycanın dövlət rəhbəri kimi fəaliyyətinin elə ilk günləri göstərdi ki, respublikamızın dövlət müstəqilliyini, ərazi bütövlüyünü etibarlı şəkildə qorumaq, ölkənin bütün potensialını məqsədyönlü şəkildə bu istiqamətə yönəltmək, hərbi təhlükəsizliyin təmin edilməsinə hesablanmış hərbi siyasət səmərəli şəkildə həyata keçiriləcək. Bunun üçün əsas şərtlərdən biri daxili ictimai-siyasi sabitliyin təmin edilməsi, xalqın bütün təbəqələrinin ümumdövlət mənafelərini əks etdirən ümummilli məqsədlər ətrafında birləşməsinə nail olunmasıdır. Ümummilli Lider Heydər Əliyevin Azərbaycanın dövlət rəhbəri kimi fəaliyyətinin xarakterik tərəflərindən biri də bu idi ki, daxili hərbi-siyasi sabitliyin, vətəndaş həmrəyliyinin, xalqın birliyinin təmin edilməsinin əhəmiyyətini düzgün qiymətləndirdi və onların əldə edilməsinə də nail oldu. Prezident İlham Əliyevin müdrik dövlət başçısı kimi yüksək diplomatik istedadı və milli maraqlara əsaslanan xarici siyasəti sayəsində Azərbaycanın müasir tarixinin yeni və şərəfli dövrü yazılır”, - deyə məqalədə diqqətə çatdırılıb.
Qeyd edək ki, bu gün Azərbaycan Sərhəd Mühafizəsinin yaranmasının 107-ci ildönümüdür.
Bölmənin digər xəbərləri
