MƏDƏNİYYƏT
MÜSLÜM MAQOMAYEV MOSKVAYA YOLA DÜŞMÜŞDÜR
Sentyabrın 12-də görkəmli həmvətənimiz, SSRİ xalq artisti Müslüm Maqomayev xanımı Tamara Sinyavskaya ilə birlikdə Moskvaya yola düşmüşdür.
Binə hava limanında böyük müğənniləri Prezidentin İcra Aparatının humanitar siyasət şöbəsinin müdiri Fatma Abdullazadə, mədəniyyət naziri Polad Bülbüloğlu və digər rəsmi şəxslər yola salmışlar.
Müslüm Maqomayev jurnalistlərin suallarına cavab verərək bildirdi ki, onun yubileyinin belə yüksək səviyyədə keçirilməsinə görə Azərbaycan Prezidenti Heydər Əliyevə minnətdardır. Müğənni vurğuladı ki, onun yaradıcı şəxsiyyət kimi formalaşmasında Vətəni Azərbaycanın rolu misilsizdir.
Tamara Sinyavskaya ölkə Prezidentinin Fərmanı ilə ona Azərbaycanın xalq artisti adı verilməsi xəbərini həyəcanla qarşıladığını, bu ada layiq görülməsinin özü üçün şərəf olduğunu və onun üzərinə böyük məsuliyyət qoyduğunu söylədi.
Foto İlqar Cəfərovundur