Narkotik vasitələrin satışı ilə məşğul olan şəbəkənin 17 üzvü tutulub
Bakı, 29 oktyabr, AZƏRTAC
Daxili İşlər Nazirliyi (DİN) Baş Narkotiklərlə Mübarizə İdarəsinin əməkdaşları narkotik vasitə və psixotrop maddələrin qanunsuz dövriyyəsi, qaçaqmalçılıq yolu ilə ölkə ərazisinə gətirilərək satışının təşkil edilməsi və narkopritonlar yaradaraq xüsusən gəncləri narkotik vasitələrdən istifadə etməyə və narkokuryerliyə cəlb edən şəbəkə üzvlərinin saxlanılması istiqamətində əməliyyatlar davam etdirirlər.
DİN-in mətbuat xidmətindən AZƏRTAC-a bildirilib ki, Baş İdarə əməkdaşlarının daxil olmuş əməliyyat məlumatı əsasında Abşeron rayonunda həyata keçirdikləri tədbir zamanı narkotik vasitələrin ölkə ərazisinə paylanmasına nəzarət edən əsas şəxslərdən biri Seymur Cavadov saxlanılıb. Onun üzərindən və Masazır qəsəbəsində narkotik vasitələrin saxlanılması üçün anbar kimi istifadə etdiyi zirzəmidən ümumilikdə 27 kiloqram, o cümlədən 19 kiloqram 565 qram heroin, 6 kiloqram 810 qram tiryək, 715 qram marixuana və narkotik vasitələrin satışında bilavasitə istifadə etdiyi elektron tərəzi aşkarlanıb.
Polis əməkdaşlarının Nəsimi rayonu ərazisində keçirdikləri tədbir zamanı Cəlilabad rayon sakini Səxavət İsmayılov narkotik vasitələrin ölkə ərazisində satışını təşkil etməkdə şübhəli bilindiyi üçün saxlanılıb. Onun üzərində axtarış aparılan zaman 8 kiloqram 490 qram psixotrop maddə “patı”, “şüşə” adlandırılan metamfetamin, 2 kiloqram 990 qram heroin aşkarlanıb. Əməliyyat tədbirlərinin davamı olaraq S.İsmayılovun Suraxanı rayonunda yaşadığı evdən 3 kiloqram 440 qram tiryək və 1 ədəd narkotik vasitələrin satışı zamanı istifadə etdiyi elektron tərəzi aşkar olunub.
Xətai rayonunda həyata keçirilən əməliyyatlar zamanı narkotik vasitələrin satışı ilə məşğul olan İsmayıl Babayev, Orxan Cavadov və Mübariz Aslanov saxlanılaraq Baş İdarəyə gətiriliblər. İ.Babayevin üzərindən və yaşadığı evdən ümumilikdə 1 kiloqram 230 qram metamfetamin, narkotik vasitələrin onlayn satışı zamanı istifadə etdiyi iki plastik kart, satışı qadağan edilən psixotrop tərkibli 30 metadon həbi və elektron tərəzi aşkarlanıb. Orxan Cavadov və Mübariz Aslanovdan isə müvafiq olaraq 124 qram heroin, 100 qram marixuana və tərəzi aşkarlanaraq götürülüb.
Baş İdarə əməkdaşlarının Abşeron rayonu Xırdalan şəhərində həyata keçirdikləri əməliyyatlar zamanı isə narkotik vasitələrin satışı ilə məşğul olan Xanım Məmmədəliyeva, Mətləb Əzizov və Çinarə Quliyeva saxlanılıblar. X.Məmmədəliyeva və M.Əzizovdan müvafiq olaraq 1 kiloqrama yaxın metamfetamin, eləcə də 2 elektron tərəzi, Ç.Quliyevadan isə 20 qram heroin aşkarlanaraq götürülüb.
Paytaxtın Binəqədi və Nizami, həmçinin Saatlı rayonlarında həyata keçirilən əməliyyatlar zamanı isə Bakı şəhərində narkokuryerlik edən Emin Rəhimzadə, Nicat Kərəmov və Sadiq Məmmədov, eləcə də Elvin Həsənovla Nəhməd Abıyev saxlanılıblar. E.Rəhimzadə, N.Kərəmov və S.Məmmədovdan 500 qrama yaxın narkotik vasitələr olan marixuana, heroin, elektron tərəzi, həmçinin Nicat Kərəmovdan əlavə 10 ədəd metadon həbi aşkar olunaraq götürülüb. Saatlı rayonunda tutulan E.Həsənov və N.Abıyevin üzərindən və yaşadıqları evlərdən isə ümumilikdə 3 kiloqram 340 qram satış üçün əldə etdikləri marixuana aşkarlanıb.
Baş İdarənin Cənub Bölgəsində Regional Şöbəsinin əməkdaşlarının Masallı və Cəlilabad rayonlarında həyata keçirdikləri əməliyyat zamanı isə qaçaqmalçılıq yolu ilə ölkə ərazisinə gətirilən külli miqdarda narkotik vasitənin satışını təşkil edən paytaxt sakinləri Rasim Şahmərdanov və tanışı Şəms Məmmədli saxlanılıblar. Onların üzərindən 22 qram heroin, metamfetamin və 2 ədəd plastik kart, R.Şahmərdanovun idarə etdiyi avtomobildən isə əlavə 10 kiloqram 380 qram heroin, 2 kiloqram 340 qram metamfetamin və elektron tərəzi, Cəlilabad rayonunda saxlanılan Səfa İbrahimovun üzərindən isə 4 qrama yaxın heroin aşkar olunub.
Baş İdarənin Qərb Bölgəsində Regional Şöbəsinin əməkdaşlarının Yevlax rayonunda həyata keçirdikləri əməliyyat zamanı isə həmin bölgədə narkotik vasitələrin satışı ilə məşğul olan Aqil Tağıyev saxlanılıb. Onun üzərindən və yaşadığı evdən 3 kiloqram 400 qram satmaq məqsədi ilə əldə etdiyi marixuana aşkarlanıb.
Bu əməliyyatlar zamanı saxlanılan 17 nəfər xarici ölkələrdə yaşayan və Azərbaycana qaçaqmalçılıq yolu ilə narkotik maddələr göndərən narkotacirlərlə əlaqələr yaradaraq narkokuryerliyə cəlb edildiklərini, həmçinin narkotiklərin satışını təşkil edən şəbəkənin üzvü olduqlarını bildiriblər. Həmin şəxslərin hər biri paytaxtda və bölgələrdə narkotiklərin satışını təşkil edib, əsasən gəncləri narkokuryerliyə cəlb etmək üçün mütəşəkkil dəstə yaradıblar. Onların cinayətləri həyata keçirilən əməliyyat tədbirləri və təkzibedilməz faktlarla tam sübuta yetirilib.
Əməliyyatlar zamanı saxlanılan şəxslərin hər biri barəsində Cinayət Məcəlləsinin müvafiq maddələri ilə cinayət işləri başlanıb, zəruri istintaq-əməliyyat tədbirləri davam etdirilir. Bu tədbirlər nəticəsində Baş İdarənin əməkdaşları tərəfindən ümumilikdə 64 kiloqramdan artıq narkotik vasitə və psixotrop maddə, o cümlədən 40 metadon həbi dövriyyədən çıxarılıb. Saxlanılan şəxslər məhkəmələr tərəfindən tutularaq barələrində həbs qətimkan tədbirləri seçilib.
DİN vətəndaşlara, xüsusən sosial şəbəkə istifadəçilərinə bir daha müraciət edərək bildirir ki, narkotik vasitələrin satışı və qanunsuz dövriyyəsi ilə bağlı əllərində olan məlumatları polis əməkdaşları ilə bölüşməkdən çəkinməsinlər. Bunun üçün məlumatlı şəxslər nazirliyin və Baş Narkotiklərlə Mübarizə İdarəsinin sosial şəbəkələrdəki rəsmi ünvanlarına da müraciət edə bilərlər. Narkotik vasitələrin qanunsuz dövriyyəsinə töhfə vermək üçün məlumatı polis əməkdaşları ilə bölüşən şəxslərin anonimliyinə tam zəmanət verilir.
Bölmənin digər xəbərləri
