Naxçıvan Muxtar Respublika Xəstəxanasının yenidən qurulan binasında tibbi təlim keçirilmişdir
Naxçıvan, 4 fevral (AZƏRTAC). Naxçıvan Muxtar Respublika Xəstəxanasının yenidən qurulan binasında tibbi təlim keçirilmişdir.
Muxtar respublikanın Səhiyyə Nazirliyinin mətbuat xidmətindən AZƏRTAC-a bildirmişlər ki, 50 nəfər inşaatçı və quraşdırıcının iştirakı ilə keçirilən tibbi təlimdə nazirliyin baş məsləhətçi-cərrahı, tibb üzrə fəlsəfə doktoru Sabir Novruzov tikinti obyektlərində baş verən istehsalat qəzalarında insanların sağlamlığının qorunması üçün həyata keçirilən tədbirlərdən danışmışdır.
Naxçıvan Muxtar Respublika Xəstəxanasının travmatologiya şöbəsinin həkim-ordinatoru Aydın Qazıbəyov, reanimasiya-anesteziologiya şöbəsinin ordinatoru Hüseyn Abdullayev və Naxçıvan Şəhər Təcili Tibb Mərkəzinin çağırışçı-həkimi Məmməd Qasımov xarici və daxili, arterial, venoz, kapillyar qanaxmalar, kəllə-beyin travmaları, zədələnmə və sınıqlar, mövsümi xəstəliklər, ürək, ağciyər çatışmazlığı zamanı göstəriləcək ilkin tibbi yardım barədə məlumat vermişlər.
Təlimdə əyani vasitələrdən geniş istifadə olunmuş, suallar cavablandırılmışdır.
Tikintinin iş icraçısı Nizami Rzayev inşaatçıların səhiyyə sahəsində maarifləndirilməsində belə tədbirlərin mühüm əhəmiyyət kəsb etdiyini vurğulamış, kollektiv adından tibb işçilərinə minnətdarlığını bildirmişdir.
Bölmənin digər xəbərləri
