Naxçıvanda “100 ilin ictimai-siyasi fəal qadını” layihəsi həyata keçirilir
Naxçıvan, 28 dekabr, AZƏRTAC
Naxçıvan Muxtar Respublikasının ilk qadın dirijoru, xormeyster Səidə Məmmədova muxtar respublikanın 100 illik yubileyi ilə əlaqədar “100 ilin ictimai-siyasi fəal qadını” layihəsi çərçivəsində ictimai-siyasi həyatda səmərəli fəaliyyətinə görə Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən təltif olunub.
Komitənin mətbuat xidmətindən AZƏRTAC-ın Naxçıvan bürosuna bildirilib ki, bu münasibətlə keçirilən tədbirdə onun həyat yoluna nəzər salınıb, uzunmüddətli səmərəli fəaliyyətindən danışılıb.
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi sədrinin müavini Aytən Məmmədova bildirib ki, “100 ilin ictimai-siyasi fəal qadını” layihəsi qadınların son bir əsrdə ictimai-siyasi proseslərdə oynadığı mühüm rolu vurğulamaq və onların əldə etdiyi nailiyyətləri geniş ictimaiyyətə tanıtmaq məqsədi daşıyan bir təşəbbüsdür. Muxtariyyətinin 100 illiyini böyük təntənə ilə qeyd etdiyimiz Naxçıvanda bu layihə qadınların tarixi və müasir nailiyyətlərini qeyd etməklə yanaşı, həm də onların gələcək uğurlarını dəstəkləmək məqsədini daşıyır.
Aytən Məmmədova qeyd edib ki, ömrünün 60 ildən çoxunu muxtar respublikada mədəniyyət və incəsənətin inkişafına həsr edən Səidə Məmmədova da seçilən qadınlardan biridir.
Azərbaycan Respublikasının Əməkdar mədəniyyət işçisi, Naxçıvan Muxtar Respublikasının Əməkdar incəsənət xadimi, Prezident təqaüdçüsü, professor, Naxçıvan Dövlət Universitetinin İncəsənət fakültəsinin Fortepiano kafedrasının kafedra müdiri Səidə Məmmədova uzun illər incəsənət sahəsində müxtəlif vəzifələrdə çalışdığını qeyd edərək bildirib ki, ömrünü xor sənətinin inkişafına həsr edib, həmişə dövlətə, dövlətçiliyə bağlı olub, ona göstərilən diqqət və qayğıya görə dövlətimizə minnətdarlıq edib.
Sonda Səidə Məmmədova “Yüz ilin ictimai-siyasi fəal qadını” layihəsi çərçivəsində ictimai-siyasi həyatda səmərəli fəaliyyətinə görə Naxçıvan MR Ailə, Qadın və Uşaq Problemləri üzrə Dövlət Komitəsi tərəfindən təltif olunub, komitənin və Naxçıvan Şəhər İcra Hakimiyyətinin hədiyyələri təqdim edilib.
Bölmənin digər xəbərləri
