Naxçıvanda sahibkarlara verilən lisenziyaların sayı artıb
Naxçıvan, 6 dekabr, AZƏRTAC
2024-cü ilin 11 ayı ərzində İqtisadiyyat Nazirliyi tərəfindən "ASAN xidmət" vasitəsilə sahibkarlara 88 lisenziya verilib. Naxçıvan Muxtar Respublikasının müvafiq qurumları tərəfindən verilmiş 4758
icazə reyestrdə qeydiyyata alınıb və 143,6 min manat vəsait daxil olub. Ötən ilin müvafiq dövrü ilə müqayisədə icazələr 14,3 dəfə, verilmiş icazələrdən daxilolmalar isə 2,3 dəfə artıb.
AZƏRTAC-ın Naxçıvan bürosu xəbər verir ki, bu sözləri Naxçıvanda “Dövlət-biznes dialoq platforması və gələcək perspektivlər” mövzusunda sahibkarlarla keçirilən görüşdə Naxçıvan Muxtar Respublikasının iqtisadiyyat nazirinin müavini, nazir vəzifələrini müvəqqəti icra edən Abbas İsmayılov deyib.
Nazir müavini qeyd edib ki, cari ilin 10 ayı ərzində Gürcüstana 3,2 milyon ABŞ dolları, Rusiyaya 1,2 milyon ABŞ dolları, Yəmənə 1,3 milyon ABŞ dolları və digər ölkələrə 3,1 milyon ABŞ dolları olmaqla, ümumilikdə, 8,8 milyon ABŞ dolları dəyərində muxtar respublikada istehsal edilmiş məhsullar ixrac olunub.
“Cari ilin 11 ayında Naxçıvanda istehsal olunmuş məhsulların ixracı üçün 335 mənşə sertifikatı verilib ki, bu da ötən ilin eyni dövrü ilə müqayisədə 24,1 faiz çoxdur”, - deyə o əlavə edib.
Bölmənin digər xəbərləri
