Neftçi övladları Uşaqların Beynəlxalq Müdafiəsi Gününü valideynlərinin iş yerlərində qeyd ediblər
Bakı, 1 iyun, AZƏRTAC
Sabunçu və Suraxanı rayonlarında fəaliyyət göstərən hasilat şirkətləri 1 İyun – Uşaqların Beynəlxalq Müdafiəsi Gününü özünəməxsus şəkildə qeyd ediblər. Neftçilərin övladları bu günü valideynlərinin peşələri ilə daha yaxından tanış olmaq üçün onların çalışdıqları iş yerlərində keçiriblər.
AZƏRTAC xəbər verir ki, Azərbaycanın neft hasilatının beşiyi hesab edilən Abşeronun tarixi mədənlərinə ekskursiyada iştirak edən uşaqlar mütəxəssislərin bələdçiliyi ilə təbii ehtiyatların hasilat mərhələləri, buruqların və dəzgahların texnoloji prosesdəki rolu, eləcə də neft sənayesi ilə bağlı digər maraqlı məlumatlarla tanış olublar.
Onlar, həmçinin inzibati ərazilərdə olub, heyətin fəaliyyəti, vəzifələri və məsuliyyətləri barədə məlumat əldə ediblər.
Neftçi övladlarını bayram münasibətilə salamlayan “Balakhani Operating Company LTD”nin prezidenti Rövşən Rzayev bildirib ki, bu gün təkcə uşaqlara valideynlərinin işlədiyi məkanı göstərmək deyil, həm də onları gündəlik fəaliyyətlərində rəhbər tutduqları fədakarlıq, məsuliyyət, dürüstlük, zəhmətsevərlik və komanda ruhu kimi dəyərlərlə tanış etmək üçün əhəmiyyətli imkandır.
Onun sözlərinə görə, hər bir valideyn övladının sağlam, xoşbəxt və uğurlu gələcəyini arzulayır və bu gələcəyin formalaşmasına yalnız yaradılan şəraitlə deyil, şəxsi nümunə ilə də töhfə verməyə çalışır.
Rövşən Rzayev qeyd edib ki, hasilat şirkətlərində neftçi peşəsini nəsildən-nəslə daşıyan ailələrdən olan çoxsaylı əməkdaşlar çalışır və bu uşaqlar arasında da gələcəkdə neftçi olmaq arzusu yarana bilər.
Neftçi övladlarını bayram münasibətilə şirkətlərdə çalışan veteran əməkdaşlar da təbrik edib, Azərbaycan neftçilərinin ölkənin inkişafına verdikləri töhfələrdən danışıblar.
Hasilat şirkətlərinin xüsusi gününə qatılan Milli Məclisin deputatı Vüqar Rəhimzadə və YAP Sabunçu rayon təşkilatının sədri Araz Xudadanov isə tədbir iştirakçılarına Ümummilli Lider Heydər Əliyevin və onun siyasi kursunun layiqli davamçısı olan prezident İlham Əliyevin uşaqların hərtərəfli inkişafını hədəfləyən dövlət proqramlarının uğurlu nəticələrini xatırladıb, Heydər Əliyev Fondu tərəfindən icra edilən biri-birindən miqyaslı layihələrin Azərbaycanın övladlarına sağlam, xoşbəxt, azərbaycançılıq ruhunda böyümələri üçün geniş imkanlar yaratdığını vurğulayıblar.
Maarifləndirici proqramdan sonra uşaqlar üçün bayram şənliyi təşkil olunub. Sonda onlar hasilat şirkətlərinin kollektivi ilə birlikdə ərazilərin yaşıllaşdırılması məqsədilə keçirilən ağacəkmə aksiyasında iştirak edib, öz kiçik töhfələri ilə bu günü yaddaqalan xatirəyə çeviriblər.
Bölmənin digər xəbərləri
