Nənəsindən öyrəndiyi sənəti “ABAD”la dünyaya tanıdır: Şamaxılı toxucunun uğuru – Müsahibə VİDEO
Şamaxı, 13 may, AZƏRTAC
Şamaxıda qədim xalq sənəti növlərindən olan toxuculuğu yaşadan gənclərdən biri də 28 yaşlı Nisə Əsgərovadır. Uşaqlıq həvəsini peşəyə çevirən Nisə hazırladığı rəngarəng əl işləri ilə həm gəlir əldə edir, həm də ənənəvi sənətin yaşadılmasına töhfə verir. Əvvəllər ev şəraitində fəaliyyət göstərən gənc sənətkar, sonradan Şamaxı Yaradıcılıq Mərkəzinə və “ABAD” layihəsinə (Ailə Biznesinə Asan Dəstək – red.) qoşularaq fəaliyyətini genişləndirib. Hazırda əsasən uşaqlar üçün ekoloji təmiz toxunma oyuncaqlar hazırlayan həmsöhbətimiz üçün bu iş sadəcə qazanc mənbəyi deyil, həm də mənəvi rahatlıq tapdığı yaradıcılıq dünyasıdır.
AZƏRTAC-ın bölgə müxbiri Şamaxı Yaradıcılıq Mərkəzində Nisə Əsgərova ilə görüşüb, onun sənət yolu və fəaliyyəti ilə bağlı söhbət edib.
— Nisə xanım, toxuculuq sənətinə marağınız necə yaranıb?
— Mənim toxuculuğa marağım uşaqlıqdan yaranıb. Nənəm bu sənətlə məşğul olurdu. Evdə həmişə müxtəlif rəngli saplar, toxuma alətləri olardı. Mən də balaca vaxtlarımdan onun necə toxuduğunu maraqla izləyirdim. O vaxt mənə çox maraqlı gəlirdi. Düşünürdüm ki, görəsən mən də belə əl işləri hazırlaya biləcəyəmmi? Sonra nənəm gördü ki, həqiqətən həvəsim var və başladı mənə öyrətməyə. İlk vaxtlar sadə toxumalar edirdim, sonra həm mil ilə, həm də toxuma qarmağı ilə işləməyi öyrəndim.
— Təhsil aldığınız dövrdə də bu sənəti davam etdirmisiniz?
— Bəli. Təhsil alsam da, başqa işlərlə məşğul olsam da, toxuculuq həmişə həyatımda olub. Bu işdən uzaq qala bilmirdim. Çünki mənə zövq verir. İnsan sevdiyi işi görəndə yorulmur. Mən də hər zaman boş vaxt tapdıqca toxuyurdum.
— İlk vaxtlar hazırladığınız məhsulları necə satırdınız?
— Əvvəllər ev şəraitində işləyirdim. Daha çox uşaq geyimləri, əlcəklər, corablar toxuyurdum. Amma satış məsələsi çətin idi. Bəzən məhsullar hazır olurdu, amma müştəri tapılmırdı. Bəzən də alan insanlar əl işinin dəyərini tam vermirdilər. Evdən işləyəndə insanın satış imkanı və tanınması məhdud olur.
— Sonradan Yaradıcılıq Mərkəzinə və “ABAD” layihəsinə qoşuldunuz. Bu sizə nə qazandırdı?
— Şamaxıda Yaradıcılıq Mərkəzinin fəaliyyətə başladığını eşidəndə çox sevindim. Çünki belə yerlər sənətlə məşğul olan insanlar üçün böyük dəstəkdir. Sonra “ABAD” layihəsinə qoşuldum. Bundan sonra əl işlərimiz daha çox tanınmağa başladı. Satış imkanlarımız artdı. Ən əsası isə, gördük ki, sənətimizə dəyər verilir. Bu da bizi daha çox həvəsləndirdi.
– Hazırda daha çox hansı növ əl işlərinə üstünlük verirsiniz?
— İndi əsasən uşaqlar üçün oyuncaqlar toxuyuram. Son dövrlərdə uşaqların sevdiyi cizgi filmi personajlarına maraq daha çoxdur. Biz də çalışırıq ki, onların marağına uyğun məhsullar hazırlayaq. Həm uşaqlar sevinir, həm də məhsullara maraq artır.
— Əl işi oyuncaqları fərqləndirən əsas xüsusiyyət nədir?
— Mağazada satılan oyuncaqların çoxu eyni olur. Amma əl işində fərqlilik var. Eyni məhsulu hazırlamağa çalışsaq da, yenə hər birinin öz fərqi qalır. Çünki insan əli ilə hazırlanır. Məncə, əl işinin gözəlliyi də məhz bundadır.
— Bu sahədə işləmək üçün ən vacib xüsusiyyət nədir?
— Ən vacib şey səbir və həvəsdir. Bu iş çox vaxt və diqqət tələb edir. İnsan bu sənəti sevməsə, davam etdirə bilməz. Bəzən bir məhsulun hazırlanmasına günlərlə vaxt gedir. Ona görə də həm səbirli, həm də zövqlü olmaq lazımdır.
— Ailəniz və ətrafınız sizə dəstək olurmu?
— Anam mənə həmişə dəstək olur. Bilir ki, bu sənəti sevirəm. Amma ətrafda bəzən deyirlər ki, bu işin gəliri azdır, niyə bu qədər vaxt sərf edirəm. Düşünürəm ki, insan yalnız qazanc üçün işləməməlidir. Bu sənət mənə rahatlıq verir, yaradıcılığımı artırır. Ən gözəl hiss isə odur ki, hazırladığım oyuncaqları uşaqlar sevə-sevə qəbul edir.
Nisə Əsgərova hesab edir ki, bölgələrdə fəaliyyət göstərən yaradıcılıq mərkəzləri və “ABAD” kimi layihələr yerli sənətkarların fəaliyyətinə böyük dəstək verir. Gənc sənətkar gələcəkdə bu sahədə daha da inkişaf etmək, əl işlərini daha geniş auditoriyaya təqdim etmək və toxuculuq sənətini yaşatmaq istədiyini bildirir.
Müxbir- Rəşad Türkoğlu
Bölmənin digər xəbərləri
