Bakının Nizami adına mədəniyyət və istirahət parkı uzun illər paytaxtın ən çox sevilən guşələrindən biri kimi məşhur idi. Parkın direktoru Alfred Quliyev
AZƏRTAC-ın müxbiri ilə söhbətində demişdir ki, Lüdviq Nobelin təşəbbüsü ilə əsası 1882-ci ildə qoyulan və “Villa Petrolea” adlanan gözəl istirahət guşəsi təəssüf ki, 1980-ci illərin ortalarından etibarən laqeydlik və biganəlik üzündən öz görkəmini itirmişdi. Son illər Xətai Rayon İcra Hakimiyyətinin köməyi və kollektivimizin səyi ilə park öz keçmiş gözəlliyini nisbətən bərpa edə bilmişdir. Abadlaşdırma işlərindən sonra parkda müntəzəm olaraq kütləvi bayram tədbirləri, xalq gəzintiləri, peşə bayramları, şənliklər, idmançıların, bədii özfəaliyyət kollektivlərinin çıxışları, konsertlər, sərgilər keçirilir.
Burada ”Luna-park” Azərbaycan-İran birgə müəssisəsinin müasir əyləncə attraksionları həm uşaqların, həm də böyüklərin ürəyincədir. Hazırda park Nobel İrsi Fonduna uzunmüddətli icarəyə verilmişdir. Parkın tarixi görkəmini bərpa etmək məqsədi ilə layihə-smeta sənədləri hazırlanır. Beləliklə, uçulub dağılmaq təhlükəsi ilə üzləşən tikililər yenidən həyata qaytarılacaqdır.
