“ODLAR YURDU” ALMANİYANI FƏTH EDİR
AZƏRTAC xəbər verir ki, xalq artisti, tarzən Ramiz Quliyevin rəhbərlik etdiyi “Odlar yurdu” ansamblı Almaniyanın Köln, Frankfurt və Boxum şəhərlərində geniş konsert proqramları ilə çıxış etmişdir.
Ansamblın və solistlərin - Gülüstan Əliyevanın və Fəraməz Gərmrudinin (İran) ifaları tamaşaçılar tərəfindən böyük maraqla qarşılanmışdır. Konsert proqramlarına Azərbaycan xalq mahnıları, muğamlar və bəstəkarlarımızın klassik əsərləri daxil idi. Kollektivin uğurlu çıxışlarına ölkənin kütləvi informasiya vasitələrinin səhifələrində geniş yer ayrılmışdır.
Ansamblın iştirakı ilə XX əsr Azərbaycan poeziyasının görkəmli nümayəndəsi Məhəmmədhüseyn Şəhriyarın 100 illik yubileyinə həsr olunmuş və onun şeir və qəzəllərindən ibarət musiqi gecəsi keçirilmişdir.
İncəsənət ustalarımız Avstriya və Kanadada keçiriləcək beynəlxalq musiqi festivallarına da dəvət olunmuşlar. Professor Ramiz Quliyev bu yaxınlarda ABŞ və Almaniyada yeni konsert proqramı ilə də çıxış edəcəkdir.
Almaniyada R.Quliyevin İran müğənnisi Fəraməz Gərmrudi ilə birgə ifasından ibarət yeni CD musiqi albomu da təqdim edilmişdir.
Bölmənin digər xəbərləri
