MƏDƏNİYYƏT
“OĞUL” QASTROLDA OLUB
Bakı Bələdiyyə Teatrının yaradıcı heyəti bu günlərdə Masallı, Cəlilabad, Lerik və Astara rayonlarında qastrol səfərində olub.
Teatrdan AZƏRTAC-a bildiriblər ki, qastrol müddətində aktyorlar yazıçı-dramaturq Aqşin Babayevin “Oğul” pyesini oynayıblar. Tanınmış naşir və ictimai xadim Əjdər Xanbabayevin həyatından bəhs edən bu əsər 1990-1993-cü illərdə respublikamızın ictimai-siyasi həyatında baş verən hadisələri geniş şəkildə əks etdirir. Tamaşada əsas rolları xalq artisti Vaqif Əliyev, əməkdar artistlər Azad Şükürov, Səmayə Sadıqova və başqaları ifa etmişlər.
Bələdiyyə Teatrının bədii rəhbəri, respublikanın xalq artisti, Milli Məclisin deputatı Amalya Pənahova qastrol zamanı tamaşaçılar qarşısında çıxış etmiş, Aqşin Babayevin “Oğul” pyesi və teatrın yaradıcılıq planları haqqında geniş məlumat vermişdir.