Oğurluq etmiş şəxsdə narkotik vasitə də aşkar olunmuşdur
Bakı, 14 may (AZƏRTAC). Xəbər verildiyi kimi, mayın 10-da C.Hacıbəyli küçəsində Bakı şəhər sakini Cahangir Həsənova məxsus “VAZ-2107” markalı avtomobildən şüşəni sındırma yolu ilə maqnitofon oğurlanmışdır.
Nərimanov Rayon Polis İdarəsi 16-cı bölməsi əməkdaşlarının keçirdikləri əməliyyat-axtarış tədbirləri nəticəsində oğurluqda şübhəli bilinən, Bakı şəhər sakini əvvəllər məhkum olunmuş Ülvi Musayev mayın 13-də yaxalanmışdır. Saxlanılan vaxt ondan 0,265 qram narkotik vasitə olan heroin də aşkar olunaraq götürülmüşdür.
Mayın 11-də Dərnəgül qəsəbəsində Bakı şəhər sakini Elvin Rəhimova məxsus “Mercedes” markalı avtomobildən şüşəni sındırma yolu ilə 3445 manat pul oğurlanmışdır.
Binəqədi Rayon Polis İdarəsi 5-ci bölməsinin əməkdaşlarının keçirdikləri əməliyyat-axtarış tədbirləri nəticəsində oğurluqda şübhəli bilinən Ramiz Quliyev, Feyruz Qarayev və Nicat Çobanov mayın 13-də yaxalanmışlar.
Daxili İşlər Nazirliyinin mətbuat xidmətindən AZƏRTAC-a bildirmişlər ki, faktlarla bağlı cinayət işi açılmış, araşdırma aparılır.
Bölmənin digər xəbərləri
