“ÖLÜMDƏN GÜCLÜ” KİTABININ TƏQDİMATI
Nizami adına Azərbaycan Ədəbiyyatı Muzeyində görkəmli şərqşünas-alim və ictimai xadim, Sovet İttifaqı qəhrəmanı, akademik, böyük vətənpərvər mərhum Ziya Bünyadova həsr olunmuş “Ölümdən güclü” kitabının təqdimat mərasimi keçirilmişdir.
AMEA tərəfindən təşkil olunmuş mərasimi akademiyanın prezidenti Mahmud Kərimov açaraq, Z.Bünyadovun şərəfli ömür yolundan, Azərbaycan xalqı qarşısında əvəzsiz xidmətlərindən danışdı və nəfis şəkildə nəşr edilmiş yeni kitabı yüksək qiymətləndirdi.
Sonra filologiya elmləri doktoru, yazıçı, kitabın redaktoru Aqşin Babayev, akademik Budaq Budaqov, Milli Məclis sədrinin müavini Gövhər Baxşəliyeva, Azərbaycan Jurnalistlər Birliyinin sədri Hacı Hacıyev, MEA-nın müxbir üzvü Vasim Məmmədəliyev, akademik Teymur Bünyadov, tarix elmləri doktoru MEA-nın müxbir üzvü, Əməkdar elm xadimi Fəridə Məmmədova, şair Nəriman Həsənzadə, Milli Məclisin deputatı Xanhüseyn Kazımlı və başqaları çıxış etdilər.
Natiqlər akademik Z.Bünyadovun geniş elmi və ictimai fəaliyyətindən, İkinci Dünya müharibəsində göstərdiyi şücaətlərdən, Azərbaycanın azadlığı uğrunda mübarizəsindən, eləcə də vətənpərvər insan kimi onun mərdliyindən və dönməzliyindən bəhs etdilər. Xüsusilə qeyd olundu ki, Ziya Bünyadov bütün həyatı boyu qəsbkar ermənilərin çirkin niyyətlərini, yalançı tarixlərini, həyasız uydurmalarını təkzibedilməz elmi dəlillərlə ifşa etmişdir.
Böyük alimin həyatının ayrı-ayrı məqamlarından bəhs edən və iki hissədən ibarət kitabın “Ziya mənim taleyimdir” adlanan birinci hissəsində akademikin həyat yoldaşı Tahirə Bünyadova Ziya müəllimin çoxlarına məlum olmayan xarakterik cizgilərini, həyatının şirinli-acılı günlərini əks etdirmişdir. “Ziya Bünyadov müasirlərinin xatirələrində” hissəsində isə Ziya müəllimin yaxın dostlarının və tələbələrinin xatirələri öz əksini tapmışdır.
Mərasimin sonunda T.Bünyadova həyat yoldaşının xatirəsini əziz tutduqlarına görə təşkilatçılara və iştirakçılara öz təşəkkürünü bildirdi.
Bölmənin digər xəbərləri
