OMBUDSMAN ABŞ-IN MİLLİ DEMOKRATİYA İNSTİTUTUNUN ÖLKƏ ÜZRƏ DİREKTORU İLƏ GÖRÜŞMÜŞDÜR
Ombudsman Aparatından AZƏRTAC-a bildirmişlər ki, müvəkkil insan hüquqlarının müdafiəsi və bərpası üzrə fəaliyyətin müvafiq dövlət qurumları, ölkə parlamenti, yerli özünüidarə orqanları olan bələdiyyələr, həmçinin QHT-lərlə sıx əməkdaşlıq şəraitində qurulduğunu söyləmişdir. Qonaqlara uşaq hüquqlarının təmin edilməsi istiqamətində görülən tədbirlər barədə də məlumat verilmişdir.
Kristi Kvark təmsil etdiyi təşkilatın siyasi partiyalar üçün təlim məşğələləri keçirdiyini, Milli Məclisə seçkilərlə bağlı maarifləndirmə xarakterli proqramlar hazırladığını bildirmişdir. Təlim məşğələlərinin daha çox regionlarda təşkilinə üstünlük verildiyini söyləyən qonaq, eyni zamanda, Bakıda da dövlət qurumları, QHT-lər, siyasi partiyaların nümayəndələrinin iştirakı ilə seçki məsələlərini müzakirə edəcəklərini söyləmişdir.
E.Süleymanova Milli Demokratiya İnstitutunun və Ombudsman təsisatının insan hüquqlarının qorunmasına xidmət etdiyini və bu iki qurum arasında səmərəli əməkdaşlığın zəruriliyini vurğulamış, gələcək işgüzar əlaqələri müəyyənləşdirməyi təklif etmişdir.
