On bir ayda 1361 kilometr yeni qaz xətti çəkilib
Bakı, 30 dekabr, AZƏRTAC
Cari ilin 11 ayı ərzində 1361 kilometr yeni qaz xətti çəkilib, 554 kilometr qaz xətti təmir edilib.
AZƏRTAC xəbər verir ki, bu barədə Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin baş direktoru Ruslan Əliyev deyib.
R.Əliyev qeyd edib ki, bundan əlavə 321 kilometr qaz xəttinin təmiri regional qaz istismarı idarələrinin imkanları hesabına reallaşdırılıb. “Bu gün “Azəriqaz” İB-in 8 min nəfərdən çox kollektivi ölkədə 69,2 min kilometr uzunluğunda olan müxtəlif diametrli qaz paylayıcı şəbəkəyə, 2 milyon 370 mindən çox əhali abonentinə xidmət göstərir. Bu həm böyük zəhmət, həm də ciddi məsuliyyət tələb edir. Məsuliyyət artdıqca müştəri məmnuniyyəti üçün səylə çalışmaq lazım gəlir. Hesab edirəm ki, bu il buna nail ola bilmişik. Yeri gəlmişkən ilin sonuna yaxın əməyimiz qiymətləndirilib. “Caspian Business Award 2020” beynəlxalq təqdimetmə mərasimində “Azəriqaz” İB “İlin qaz təminatçısı” mükafatına layiq görülüb”, - deyə baş direktor diqqətə çatdırıb.
Bölmənin digər xəbərləri
