OPEK-İN NEFT KVOTALARININ ARTIRILMASI İLƏ BAĞLI HEÇ BİR PROBLEMİ YOXDUR
Bu, Qətər Baş nazirinin müavini Abdalla ben Həməd əl-Əttiyyənin OPEK-in Vyanadakı baş katibliyinin kanalları ilə yayılmış bəyanatında bildirilmişdir.
Uzun müddət dünya neft kartelinin prezidenti olmuş Əl-Əttiyyənin bəyanatında deyilir ki, “OPEK dünya enerji bazarlarında sabitləşməyə görə üzərinə düşən məsuliyyəti başa düşür, xam neftə tələbatın qlobal artımına müvafiq cavab verməyə və Vyana konfransının qərarını yerinə yetirməyə hazırdır”.
Onun sözlərinə görə, “ümumi neft kvotalarının gündə 27 milyon barrelədək artırılması barədə Vyana konfransının 15 sentyabr tarixli qərarının yerinə yetirilməsi yolunda heç bir maneə olmayacaq, çünki həmin qərar OPEK üzvü olan, “qara qızıl”a optimal və ədalətli qiymətlər qoyulmasına maraq göstərən 11 ölkənin hamısının razılığı əsasında qəbul edilmişdir”.
Qətərin Baş naziri müavininin proqnozlarına görə, “xam neftə və digər karbohidrogenlərə tələbat daim artacaq, hasilatçılar isə bunu nəzərə almalı və dünya neft bazarlarında gərginliyin yaranmaması üçün müvafiq tədbirlər görülməsini planlaşdırmalıdırlar”.
Bölmənin digər xəbərləri
