Ötən ay 63 şəhər və rayonun əhalisinə 1 milyondan çox tibbi xidmət göstərilib
Bakı, 18 mart, AZƏRTAC
İcbari tibbi sığortanın tətbiq olunduğu tibb müəssisələri tərəfindən İcbari Tibbi Sığorta üzrə Dövlət Agentliyinə təqdim edilən ilkin hesabatlara əsasən, cari ilin fevral ayı ərzində 63 şəhər və rayon üzrə 493 min 718 vətəndaşa 1 milyon 822 min 749 tibbi xidmət göstərilib. Ay ərzində tibb müəssisələrinə 826 min 335 müraciət daxil olub. Bu isə ölkə üzrə qeydə alınan bütün tibbi xidmət sayının 63, müraciət sayının isə 62 faizini əhatə edir. Fevral ayında bölgələrdə müraciətlər üzrə tibbi xidmətlərin 86 faizi ambulator, 14 faizi isə stasionar şəraitdə göstərilib.
Bu barədə AZƏRTAC-a İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentindən məlumat verilib.
Bildirilib ki, tibb müəssisələrinə müraciətlərin çoxu tibbi müayinə (hərbi xidmətə çağırılanların müayinəsi daxil olmaqla), tənəffüs sistemi, qan dövranı sistemi, endokrin sistemin xəstəlikləri, maddələr mübadiləsi və qidalanma pozulmaları, sidik-cinsiyyət sistemi, həzm sistemi, sümük və əzələ sisteminin və birləşdirici toxumanın, gözün və gözün əlavə aparatının xəstəlikləri, müəyyən simptomlar, habelə mamalıq və ginekologiya ilə bağlı olub.
Ötən ay üzrə bölgələrdə əhaliyə göstərilən tibbi xidmətlərə dair digər göstəricilər:
Əhalinin hər 1000 nəfərinə tibb müəssisələrinə olunan müraciət sayına əsasən ilk onluqda yer alan şəhər və rayonlar: Mingəçevir, Sumqayıt, Balakən, Gəncə, Şirvan, Qax, Yevlax, Beyləqan, Göygöl və Göyçay.
Ən çox ambulator xidmət göstərmiş tibb müəssisələrinin ilk onluğu: Gəncə Şəhər Birləşmiş Xəstəxanası, Sumqayıt Tibb Mərkəzi, Mingəçevir Şəhər Mərkəzi Xəstəxanası və Xaçmaz, Bərdə, Yevlax, Qəbələ, Quba, Balakən, Göyçay rayon mərkəzi xəstəxanaları.
Ən çox stasionar xidmət göstərmiş tibb müəssisələrinin ilk onluğu: Sumqayıt Tibb Mərkəzi, Gəncə Şəhər Birləşmiş Xəstəxanası, Mingəçevir Şəhər Mərkəzi Xəstəxanası və Quba, Ağdaş, Bərdə, Lənkəran, Xaçmaz, Şəki, Salyan rayon mərkəzi xəstəxanaları.
Qeyd olunmalıdır ki, bir sıra tibb müəssisələri həm ambulator, həm stasionar tibbi xidmət göstərmiş müəssisələrin ilk onluğunda yer alıblar. Bunlar Gəncə Şəhər Birləşmiş Xəstəxanası, Sumqayıt Tibb Mərkəzi, Mingəçevir Şəhər Mərkəzi Xəstəxanası və Xaçmaz, Bərdə, Quba rayon mərkəzi xəstəxanalarıdır.
Diqqətə çatdıraq ki, ilin ilk iki ayı ərzində 63 şəhər və rayon üzrə 808 min 178 şəxsə 1 milyon 584 min 670 müraciət üzrə 3 milyon 503 min 224 tibbi xidmət göstərilib. Bu isə iki ay ərzində ölkə üzrə qeydə alınan bütün müraciət sayının 63, tibbi xidmət sayının isə 64 faizini əhatə edir.
2021-ci il yanvarın 1-nə olan rəsmi məlumata əsasən icbari tibbi sığortanın tətbiq edildiyi 63 inzibati ərazi vahidi üzrə qeydiyyatda olan əhalinin sayı 7 milyon 266 min 300 nəfər, bütün bölgələr üzrə isə 9 milyon 657 min 600 nəfərdir.
Ölkə üzrə cari ilin yanvar-fevral ayları ərzində 1 milyon 244 min 351 vətəndaşa 5 milyon 465 min 999 tibbi xidmət göstərilib. Beləliklə, bu dövrdə əhalinin 13 faizi icbari tibbi sığortadan yararlanıb. 2 milyon 507 min 890 müraciət üzrə tibbi xidmətlərin 82 faizi ambulator, 18 faizi isə stasionar şəraitdə göstərilib. Həmin xidmətlərdən istifadə edənlərin 27 faizini uşaqlar, 73 faizini isə böyüklər təşkil edir.
Bölmənin digər xəbərləri
