ÖTƏN İL AĞDAM RAYONU ÜÇÜN UĞURLU OLMUŞDUR
AZƏRTAC xəbər verir ki, fevralın 8-də Ağdam Rayon İcra Hakimiyyətində 2007-ci ilin yekunları və 2008-ci ildə qarşıda duran vəzifələrə həsr olunmuş hesabat yığıncağı keçirilmişdir.
Yığıncaq iştirakçıları əvvəlcə ümummilli lider Heydər Əliyevin abidəsini ziyarət etmiş, önünə gül-çiçək düzmüşlər.
Rayon icra hakimiyyətinin başçısı Həsən Sarıyevin hesabat məruzəsində Ağdamın sosial-iqtisadi inkişafının ölkə rəhbərinin daim diqqət mərkəzində olması ön plana çəkilmişdir. Məruzəçi qeyd etmişdir ki, Prezident İlham Əliyevin yeni ildə regionlara ilk səfərinə rayonumuzdan başlaması, “Ağdam rayonunun sosial-iqtisadi inkişafının sürətləndirilməsinə dair əlavə tədbirlər haqqında” Sərəncam imzalaması, Prezidentin Ehtiyat Fondundan rayonun sosial-iqtisadi inkişafı üçün 2 milyon manat vəsait ayırması ağdamlıların qurub-yaratmaq əzmini və gələcəyə inamını daha da artırmışdır.
Rayonun sosial-iqtisadi inkişafından danışan məruzəçi qeyd etmişdir ki, ötən il yerli büdcənin gəlirləri 2006-cı illə müqayisədə 5,7 milyon manata çox olmuşdur. 2007-ci ildə rayon üzrə ümumi məhsul buraxılışı 2004-cü illə müqayisədə 2,5 dəfə, o cümlədən sənaye məhsulunun həcmi 1,9 dəfə, tikinti işlərinin həcmi 21,1 dəfə, kənd təsərrüfatı məhsulları istehsalı 1,5 dəfə, rabitə xidmətinin həcmi 1,8 dəfə, ticarət dövriyyəsi 1,2 dəfə artmışdır.
2007-ci ildə rayon ərazisində məskunlaşmış qaçqın və məcburi köçkünlərə 1614,8 ton un, 322,9 ton düyü, 322,9 ton şəkər tozu, 322 min 968 litr bitki yağı, 13 milyon 926 min 034 manat məbləğində yemək xərci müavinəti, payız-qış mövsümündə 1650 ton ağ neft yanacağı verilmişdir.
Hesabat dövründə rayondaxili və kəndarası yolların təmiri və bərpası məqsədi ilə DZ-506 markalı asfalt-beton zavodu, daxili vəsait hesabına bir ədəd 400 kilovatlıq elektrik transformatoru quraşdırılmışdır.
Birinci Dördyol qəsəbəsində 10 çarpayılıq xəstəxana, eyni vaxtda 50 nəfəri qəbul edən poliklinika, Təzəkənd, İkinci Dördyol, İkinci Alıbəyli və Səfərli qəsəbələrində tibb məntəqələri, Birinci Quzanlı, Birinci Alıbəyli qəsəbələrində feldşer-mama məntəqələri, Baharlı qəsəbəsində ambulatoriya inşa edilərək istifadəyə verilmişdir.
Gənclərin asudə vaxtlarının səmərəli təşkili üçün Quzanlı qəsəbəsində internet klub, 118 və 119 saylı seçki dairələri dairə seçki komissiyalarının binaları, muzey və idman kompleksinin tikintisi başa çatdırılaraq istifadəyə verilmişdir.
Ötən ilin payızında 2008-ci ilin məhsulu üçün 7490 hektar sahəyə taxıl səpilmişdir ki, bu da əvvəlki ildəkindən 6,9 faiz çoxdur.
Hesabat dövründə rayonda iribuynuzlu mal-qara 30465 baş, qoyun və keçilər 107197 baş, diri çəkidə ət istehsalı 2478 ton, süd istehsalı 23189 ton, yumurta istehsalı 7978 min ədəd, yun istehsalı 129,4 ton, meyvə istehsalı 2433 ton, tərəvəz istehsalı 40300 ton olmuşdur.
Quzanlı və Qasımbəyli qəsəbələrində 16 km uzunluğunda yola asfalt-beton örtüyü çəkilmiş, abadlaşdırma işləri aparılmışdır.
2007-ci ildə 938 yeni iş yeri açılmışdır ki, bundan da 389-u daimidir.
2007-ci ildə rayonun Ayaq Qərvənd və Eyvazlı kəndlərinin hər birində müasir məktəb binası tikilərək şagirdlərin istifadəsinə verilmişdir. Heydər Əliyev Fondunun “Yeniləşən Azərbaycana yeni məktəb” proqramı çərçivəsində Bakı şəhərində fəaliyyət göstərən 81 nömrəli Ağdam köçkün orta məktəbi əsaslı təmir edilmişdir.
Rayon mərkəzi xəstəxanası əsaslı təmir edilmiş, tibbi avadanlıqlarla təmin olunmuşdur.
Məruzə və çıxışlarda uğurlarla yanaşı problemlər də sadalanmış, onların həlli ilə bağlı təkliflər irəli sürülmüşdür. Çıxış edənlər bildirmişlər ki, ağdamlılar həmişə olduğu kimi, bundan sonra da işgüzarlıq, əzmkarlıq nümayiş etdirəcək və qarşıdan gələn Prezident seçkilərində ulu öndər Heydər Əliyev siyasi kursunun layiqli davamçısı İlham Əliyevə səs verəcəklər.
Yığıncaqda cari ildə görüləcək işlərlə əlaqədar tədbirlər planı müzakirə edilmiş və müvafiq qərar qəbul olunmuşdur.
Hesabat yığıncağında daxili işlər naziri Ramil Usubov, Milli Məclisin deputatı Bəxtiyar Sadıqov çıxış etmişlər.
Sonda Prezident İlham Əliyevə müraciət qəbul olunmuşdur.
Yığıncaqda Prezidentin İcra Aparatının məsul işçisi Nuridin Hüseynov iştirak etmişdir.
Bölmənin digər xəbərləri
