Ötən il Nəsimi rayonunda 8306 yeni daimi iş yeri açılıb
Bakı, 2 fevral, AZƏRTAC
Nəsimi Rayon İcra Hakimiyyəti (RİH) başçısı yanında şuranın geniş iclasında 2018-ci ildə rayonun sosial-iqtisadi inkişafına yekun vurulub.
AZƏRTAC xəbər verir ki, yığıncaqda Prezident İlham Əliyevin sədrliyi ilə Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş iclasında qarşıya qoyulmuş vəzifələr müzakirə olunub, yeni ilin başlıca hədəflərini əhatə edən qərar qəbul edilib.
İclası giriş sözü ilə açan Nəsimi Rayon İcra Hakimiyyətinin başçısı Asif Əsgərov bildirib ki, ötən il respublikamızın bütün rayonlarında olduğu kimi, Bakının Nəsimi rayonunda da davamlı sosial-iqtisadi inkişaf təmin edilib, bir sıra layihələr uğurla həyata keçirilib.
Yığıncaq iştirakçılarına ötən il rayonda əldə olunan uğurları əks etdirən videohesabat təqdim olunub.
Sonra icra başçısı Asif Əsgərov 2018-ci ildə sosial-iqtisadi inkişafın əsas göstəricilərini şərh edib, dövlətimizin başçısının paytaxtın və onun rayonlarının hərtərəfli inkişafı ilə bağlı həyata keçirdiyi siyasətin növbəti hədəfləri barədə məlumat verib.
İcra başçısı qeyd edib ki, dövlətimizin başçısının ötən ilin əvvəlində yerli icra strukturlarına verdiyi tapşırıqların Nəsimi rayonunda bütünlüklə və ardıcıl icrası ilin uğurla başa çatdırılmasını təmin edib. Rayon üzrə iqtisadiyyatın bütün sahələrində mövcud olan artım dinamikası saxlanılıb, 8306 yeni daimi iş yeri açılıb, orta aylıq əməkhaqqı əvvəlki illə müqayisədə 6,1 faiz artıb. Həmçinin sakinlərin mənzil-məişət şəraitinin yaxşılaşdırılması, mövcud şəhərsalma normalarına cavab verməyən, şəhərin ümumi görünüşünə xələl gətirən yaşayış binalarının, sosial və digər qeyri-yaşayış obyektlərinin sökülərək yenidən qurulması, yeni yaşayış binalarının inşası, əlavə iş yerlərinin yaradılması məqsədilə Nazirlər Kabinetinin müvafiq Qərarının icra olunması istiqamətində ötən dövr ərzində rayon icra hakimiyyəti tərəfindən ardıcıl işlər görülüb. Təhsil, səhiyyə, mədəniyyət obyektlərinin işi də daim diqqət mərkəzində olub. Vətəndaşların müəyyən edilmiş vaxtlarda qəbulu, onların müraciətlərinə yazılı cavabların verilməsi, şəffaflığın artırılması, mövcud nöqsanların aradan qaldırılması məsələləri daim diqqət mərkəzində saxlanılıb.
Azərbaycan Respublikası Prezidenti Administrasiyasının sektor müdiri Tağı Tağıyev, Azərbaycan Dillər Universitetinin rektoru, akademik Kamal Abdullayev, YAP Nəsimi rayon təşkilatının sədri, Milli Məclisin deputatı Məlahət İbrahimqızı və Bakı şəhəri Azərbaycan Dağ Yəhudiləri Dini İcmasının sədri Melih Yevdayev çıxış edərək rayonda görülmüş işləri yüksək qiymətləndirib, qarşıda duran vəzifələrdən söhbət açıblar.
Sonda rayonun ictimai-siyasi həyatında fəal iştirak edənlərə rayon icra hakimiyyətinin xatirə hədiyyələri təqdim olunub.
Bölmənin digər xəbərləri
