Ötən il Səngəçal terminalından 16,4 milyard kubmetr “Şahdəniz” qazı ixrac edilib
Bakı, 6 fevral, AZƏRTAC
2019-cu ildə Səngəçal terminalından 16,4 milyard kubmetr “Şahdəniz” qazı ixrac olunub.
AZƏRTAC xəbər verir ki, bu barədə “BP Azerbaijan” şirkəti məlumat yayıb.
Qeyd edək ki, keçən il terminaldan gündəlik orta hesabla 45 milyon standart kubmetr (1 milyard 600 milyon standart kubfutdan çox) “Şahdəniz” qazı ixrac olunub. İl ərzində “Şahdəniz” yatağından qazın sualtı boru kəmərləri vasitəsilə Səngəçal terminalına göndərilməsi davam edib. Terminalın texniki emal sistemlərinin gündəlik gücü hazırda “Şahdəniz” qazı üçün təqribən 80 milyon standart kubmetrdir. Ümumi qaz emalı və ixracı gücü isə (AÇG səmt qazı da daxil olmaqla) gündəlik təqribən 100 milyon standart kubmetr təşkil edir.
Qaz terminaldan əsasən Cənubi Qafqaz Boru Kəməri (CQBK), Cənubi Qafqaz Boru Kəmərinin genişləndirilməsi sistemi və terminalın qaz emalı obyektlərini “Azəriqaz”ın qazpaylama sistemi ilə birləşdirən SOCAR-a məxsus qaz kəməri ilə ixrac olunur.
Bölmənin digər xəbərləri
