Pambıq sahələrində çiyid səpini yekunlaşmaq üzrədir
Bakı, 18 may, AZƏRTAC
Respublika ərazisində pambıq əkini ilə bağlı çiyid səpini yekunlaşmaq üzrədir. Bu günədək pambıq şirkətləri tərəfindən 20 minə yaxın fermerlə 99693 hektar sahədə pambıq əkininə dair müqavilə imzalanıb.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildiriblər ki, mayın 18-dək 99180 hektar sahədə şum, 97988 hektar sahədə isə çiyid səpini aparılıb. Səpin aparılmış ərazilərin təxminən 85 faizində (84143 hektar) çıxış alınıb. Pambıq əkininin yaxın günlərdə tam şəkildə başa çatacağı gözlənilir.
Bu il Azərbaycanın 21 rayonunda pambıq əkini proqnozlaşdırılır. Ən çox əkin ənənəvi pambıqçılıq rayonlarından olan Saatlı (13720 hektar), Bərdə (11300 hektar), Biləsuvar (10553 hektar), Ağcabədi (10320 hektar) və Sabirabadın (9551 hektar) payına düşür.
Qeyd edək ki, ötən il Azərbaycanda 294 min ton pambıq yığılıb və hər hektardan orta məhsuldarlıq 29,4 sentner təşkil edib.
2020-ci ildən tətbiq olunan yeni subsidiya mexanizminə əsasən, pambıqçı fermerlərə ilk dəfə olaraq həm əkin, həm məhsul subsidiyası veriləcək. Pambıqçı fermerlər əkin sahəsinin hər hektarına görə 220 manat, məntəqələrə təhvil verdikləri pambığın hər tonuna görə 100 manat subsidiya alacaqlar.
Bölmənin digər xəbərləri
