Parisdə AŞPA Bürosunun və komitələrinin iclasları keçiriləcək
Bakı, 31 avqust, AZƏRTAC
Sentyabrın 4-dən 7-dək Parisdə Avropa Şurası Parlament Assambleyası (AŞPA) Bürosunun, hüquqi məsələlər və insan hüquqları, siyasi işlər və demokratiya, həmçinin monitorinq komitələrinin iclasları keçiriləcək. Bu barədə AZƏRTAC-a Milli Məclisin mətbuat xidmətindən məlumat verilib.
İclaslarda Milli Məclisin beynəlxalq münasibətlər və parlamentlərarası əlaqələr komitəsinin sədri, ölkəmizin təşkilatdakı daimi nümayəndə heyətinin rəhbəri Səməd Seyidovun başçılıq etdiyi deputat qrupu iştirak edəcək. Nümayəndə heyətinə deputatlardan Sahibə Qafarova, Vüsal Hüseynov və Sabir Hacıyev daxildir.
Büro iclasında Avropa Şurası baş katibinin qurumun fəaliyyətinə dair məruzəsi dinləniləcək. AŞPA-nın payız sessiyasının gündəlik layihəsi təsdiqlənəcək. Həmçinin yeni siyasi qrupun - “Azad demokratlar qrupu”nun formalaşdırılması ilə bağlı məsələnin müzakirəsi nəzərdə tutulub.
Assambleyanın komitələrinin iclaslarında nümayəndə heyətinin üzvləri müzakirəyə çıxarılacaq məsələlərə münasibət bildirəcək, öz qeyd və təkliflərini verəcəklər.
Bölmənin digər xəbərləri
