Parisdə dahi şair Nizami Gəncəviyə, həsr olunan konsert təşkil edilmişdir
Paris, 14 noyabr (AZƏRTAC). Heydər Əliyev Fondunun təşkilatçılığı və ölkəmizin Fransadakı səfirliyinin dəstəyi ilə noyabrın 13-də Parisdəki Azərbaycan Mədəniyyət Mərkəzində dahi şair Nizami Gəncəviyə həsr olunan konsert təşkil edilmişdir.
Aparıcı Alen Tremolier dünya şöhrətli şair Nizami Gəncəvinin Azərbaycanın ikinci böyük şəhəri olan qədim Gəncədə anadan olduğunu, ədəbiyyatla yanaşı, elmin müxtəlif sahələrində mükəmməl təhsil aldığını, yüksək insani dəyərlərin təsvir edildiyi beş poeması ilə dünya ədəbiyyatı tarixinə xüsusi töhfə verdiyini və şairin 870 illiyinin təntənəli şəkildə qeyd olunduğunu diqqətə çatdırmışdır.
Azərbaycanın Fransadakı səfiri Elçin Əmirbəyov bir gün öncə şairin həyat və yaradıcılığı ilə bağlı Parisin Məktublar və Əlyazmalar Muzeyində sərgi təşkil edildiyini xatırlatmış, N.Cəncəvinin ədəbiyyat, elm və xüsusilə humanist sahədə zəngin irs qoyduğunu vurğulamış, beş poemasının toplandığı “Xəmsə”nin yaranmasından səkkiz əsr keçməsinə baxmayaraq, bu gün də öz aktuallığını itirmədiyini bildirmişdir.
Əxlaqi ideyalarla zəngin əsərlər yaradan şairin xatirəsinin dünya mədəniyyətinin beşiyi hesab edilən Fransada anılmasının heç də təsadüfi olmadığını qeyd edən səfir Nizami Gəncəvinin poemalarının əsas məzmununu təşkil edən azadlıq, bərabərlik və qardaşlıq kimi fikirlərin Fransanın əsas devizi olduğunu bəyan etmişdir.
E. Əmirbəyov N. Gəncəvinin 870 illiyi ilə əlaqədar Fransada üç tədbirdən artıq ikisinin - sərgi və konsertin təşkil edildiyini və bir neçə gündən sonra Strasburqda möhtəşəm mərasimin keçirilməsinin nəzərdə tutulduğunu bildirmişdir. O, Azərbaycanın birinci xanımı Mehriban Əliyevanın rəhbərlik etdiyi Heydər Əliyev Fondu tərəfindən şairin həyat və yaradıcılığına dair əsərlərin yenidən nəşr olunduğunu diqqətə çatdırmışdır.
Fransanın Yon regionu Ali Şurasının sədri Andre Vilye çıxışında zəngin tarixə və mədəniyyətə malik Gəncə şəhərinə dəfələrlə səfər etdiyini, Nizami Gəncəvinin mavzoleyinə baş çəkdiyini, ötən il dahi şairin 870 illik yubileyi ilə bağlı tədbirlərdə iştirak etdiyini xatırlatmış, azərbaycanlıların, o cümlədən gəncəlilərin Nizami Gəncəvi irsinə dərin hörmət bəsləmələrinin şahidi olduğunu qeyd etmişdir.
Andre Vilye Nizami Gəncəvinin yalnız şair deyil, böyük filosof və alim olduğunu, dünyaya çox dəyərli əsərlər bəxş etdiyini diqqətə çatdırmış, şairin 870 illiyinə həsr olunan tədbirlərin Fransada keçirilməsinə, əsərlərinin fransız dilində nəfis şəkildə çap etdirilməsinə görə Heydər Əliyev Fondunun prezidenti Mehriban Əliyevaya minnətdarlığını bildirmişdir. Qeyd etmişdir ki, Fondun Parisdə və Fransanın digər bölgələrində həyata keçirdiyi layihə sayəsində fransızlar dahi Azərbaycan şairinin həyat və yaradıcılığı barədə müfəssəl məlumat əldə etmək imkanına malik olacaqlar.
Senatın Qafqaz üzrə dostluq qrupunun sədr müavini Jeanny Lorgoeux Nizami Gəncəvinin 870 illik yubileyi münasibətilə Azərbaycan xalqını təbrik etmiş və şairin Şərq ədəbiyyatında oynadığı mühüm roldan söhbət açmışdır.
Şairin Xll əsrdə Şərq intibahının əsas simalarından biri olduğunu diqqətə çatdıran senator N. Gəncəvinin yaratdığı əsərlərin yalnız doğma Vətəni Azərbaycan üçün deyil, eyni zamanda bütün bəşəriyyət üçün qiymətli mədəni irs olduğunu vurğulamışdır.
Senator Heydər Əliyev Fondunun şairin həyat və yaradıcılığına dair fransız dilində materiallar hazırlamasını yüksək qiymətləndirmiş, Fondun təşkilatçılığı və Azərbaycan səfirliyinin dəstəyi ilə “Qafqazın mirvarisi olan Azərbaycanın mədəni dəyərləri” layihəsi çərçivəsində Yon regionunda təşkil edilən sərgi və konsertin region sakinlərinin yaddaşında əbədi iz qoyduğunu vurğulamışdır.
Sonda incəsənət ustaları maraqlı konsert proqramı ilə çıxış etmişlər. Konsertdə solistlərdən Ramil Qasımovun, Gülnaz İsmayılovanın və xanəndə Arzu Əliyevanın ifasında Azərbaycan bəstəkarlarının Nizami Gəncəvinin əsərlərinə bəstələdikləri romanslar və mahnılar səslənmişdir. Onları pianoda Elnarə Kəbirlinskaya, tarda Elçin Həşimov və kamançada Elnur Əhmədov müşayiət etmişlər. Gənc skripkaçı Osman Eyyublu “Yeddi gözəl” baletindən parçalar ifa etmişdir.
İncəsənət ustalarının çıxışları musiqisevər fransız tamaşaçıları tərəfindən böyük maraqla qarşılanmışdır.
Parisin 7-ci rayonunun meri, senatorlar, deputatlar, tanınmış aktyorlar, dövlət rəsmiləri, fransız ictimaiyyətinin nümayəndələri, ölkədə akkreditə olunmuş diplomatik korpusun üzvləri, diasporumuzun təmsilçiləri və tələbələr konserti izləmişlər.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
