MƏDƏNİYYƏT
PARİSDƏ MUĞAMAT KONSERTİ
Fransız tamaşaçılarına artıq yaxşı tanış olan Alim Qasımov Fransa radiosunun dəvəti ilə sentyabrın 15-də Parisdə “Fransa Radiosu Evi”-n də geniş proqramda konsert vermişdir. Alim Qasımov “Rast”, “Segah”, “Çahargah” muğamları ilə yanaşı “Evləri var xana-xana”, “Dedim bir busə ver” və “Gözəlim sənsən” kimi xalq mahnılarını özünəməxsus ustalıqla ifa etmişdir. Onun çıxışı sürəkli alqışlarla qarşılanmış, fransız musiqisevərləri müğənni dəfələrlə səhnəyə qayıtmağa məcbur etmişlər.
Konsertdə muğamlarımızın məharətli ifaçısını Malik Mansurov (tarda), Rauf İslamov (kamançada), Rəfael Əsgərov (neydə) və Natiq Şirinov (balabanda) müşaiət etmişlər.
Konsertdən sonra AZƏRTAC-ın müxbiri bir neçə fransız tamaşaçısından müsahibə almışdır.
Elen Azera: - Alim Qasımov oxuduğu xalq mahnılarının sözlərini başa düşməsəm də onun səsindəki ecazakarlıq məni məftun etdi. Ifa zamanı bədən hərəkətlərini mahnıya uyğunlaşdırması onun həqiqi istedadını üzə çıxarırdı. Onun səsini dinlədikcə mən özümü qəribə bir dünyada hiss edir, qəlbimdə sevinc duyurdum. Bəli, Alim həqiqətən istedad sahibidir.
Qiyom Lökok: - Açığını deyim ki, hələ də Alim Qasımovun səsinin təsiri altındayam. Fikrimi izah etməyə söz tapa bilmirəm.
Musiqi insanlar arasında anlaşılmazlığı aradan qaldıran, ünsiyyət yaradan bir sehrkar qüvvədir. Bunu Alimin timsalında bir daha aydın şəkildə dərk etdik. Alim dünyada təkrar olunmaz istedad sahibidir. Məhz Alim kimi istedadlar sayəsində Azərbaycan hər yerdə daha yaxşı tanına bilər. Ona görə də belə müğənnilərin konsertlərini tez-tez təşkil etmək lazımdır.
Əsgər Əliyev
AZƏRTAC-ın xüsusi müxbiri
Paris