PAVEL ÇUXRAYIN RUS OYUNU
AZƏRTAC xəbər verir ki, iyunun 2-də “Azərbaycan” kinoteatrında “Şərq-Qərb” X Beynəlxalq Bakı kinofestivalı çərçivəsində Rusiya kinorejissoru Pavel Çuxrayın “Rus oyunu” filmi nümayiş etdirilmişdir. Film N.Qoqolun məşhur pyesi əsasında 2007-ci ildə “Korsa Film” kinostudiyasında çəkilmişdir.
Filmdə italiyalı qumarbaz Lukino Fortsadan söhbət açılır. Qəhrəmanın borc aldığı adamlar ondan pullarını tələb edirlər. Əgər müəyyən vaxta qədər lazım olan məbləğ tapılmasa, onu İtaliyada həbsxana gözləyir.
Lukino Fortsa arvadının vətəni Rusiyaya yollanır ki, burada çoxlu pul qazanıb borclarını qaytarsın, həyatını və əmlakını xilas etsin. Bunun üçün ona bir həftə vaxt verilir. Rus qumarbazları ilə görüşənədək o, nişanlanmış kartlarla artıq 80 min rubl qazanır. Qumarbaz bir-birinin “peşəkar”lıqlarını qəbul edirlər və birlikdə işləməyə söz verirlər.
Baş rollarda Sergey Makovetski, Sergey Qarmaş, Andrey Merzlikin, Culiano di Kapoa, Dmitri Vısotski, Anna Fonxof çəkilmişlər.
Filmin nümayişindən əvvəl əsərin ssenari müəllifi və rejissoru Pavel Çuxray çıxış etmişdir.
######
Bölmənin digər xəbərləri
