PAYTAXTIN BƏZİ KÜÇƏ VƏ YOLLARINDA NƏQLİYYAT VASİTƏLƏRİNİN HƏRƏKƏTİ MƏHDUDLAŞDIRILACAQDIR
Bakı Şəhər Dövlət Yol Polisi İdarəsinin şöbə müdiri Vaqif Əsədov AZƏRTAC-a bildirmişdir ki, 28 May - Respublika günü münasibətilə paytaxtda Bakı Qarnizonu Qoşunlarının iştirakı ilə nizami gəzinti təşkil olunacaqdır.
V.Əsədovun sözlərinə görə, mayın 28-də keçiriləcək tədbir zamanı avtomobil karvanlarının sərbəst, rahat və təhlükəsiz hərəkətini təmin etmək məqsədi ilə bir sıra küçə və yollarda avtomobillərin hərəkəti məhdudlaşdırılaraq istiqamət dəyişdiriləcəkdir. Sürücülərdən səhər saatlarından tədbir qurtaranadək Bəhramgur heykəli-Azneft meydanı-Neftçilər prospekti-Azadlıq meydanı istiqamətinə, Zığ şosesi-Gəncə prospekti-Neapol dairəsi, Səməd Vurğun bağı-28 May küçəsi-Bülbül prospekti, Neftçilər prospekti-Azadlıq meydanı, Şəhidlər xiyabanı-Nəriman Nərimanovun heykəli, Ə.Ələkbərov küçəsi-Hüseyn Cavid, Nəriman Nərimanov, İnşaatçılar prospektləri, Zabitlər bağı, Milli Sirkin qarşısı, Heydər Əliyev adına Saray-Rəşid Behbudov küçəsi-Dövlət Dillər Universiteti, keçmiş “Spartak” stadionu-Füzuli meydanı-Hüsü Hacıyev küçəsi-Fəvvarələr meydanı, Qara Qarayev, Neftçilər metro stansiyalarının yanından 8-ci kilometr qəsəbəsi istiqamətlərində, Tbilisi prospekti-İzmir küçəsi-Bakıxanov küçəsi, “Moskva” Univermağı-Zərifə Əliyeva adına park və göz xəstəxanası, Lökbatan qəsəbəsi-Biləcəri dəmir yolu stansiyası istiqamətlərində yollardan az istifadə etmələri xahiş olunur.
Əhalinin, avtonəqliyyat sahiblərinin və sürücülərin nəzərinə çatdırılır ki, tıxacların və digər xoşagəlməz halların qarşısının alınması, tədbir iştirakçılarının təhlükəsizliyinin təmin edilməsi məqsədi ilə mümkün qədər alternativ yollardan istifadə etsinlər.
