Peyvənd olunanların səhhəti normaldır, heç bir əks təsir müşahidə edilməyib
Bakı, 22 yanvar, AZƏRTAC
Xəstəxanamızda peyvənd vurulması üçün yüksək səviyyədə hazırlıq işləri aparılıb. Ümumilikdə 8, o cümlədən 1 qeydiyyat, 1 gözləmə, 3 peyvənd, 1 müşahidə, 1 təxirəsalınmaz tibbi yardım və 1 kompüter otağı ayrılıb. Həmçinin bu mühüm tədbirin aparılması üçün hərəsində 2 həkim və 4 tibb işçisi olmaqla iki növbədə işləyirik.
Bu məlumatı AZƏRTAC-ın müxbirinə Bakının Qaradağ rayonundakı 17 nömrəli Birləşmiş Şəhər Xəstəxanasının baş həkimi Elmira Rəfailova verib.
Onun dediyinə görə, son üç gün ərzində 25 nəfər tibb işçisi könüllü olaraq peyvənd olunub. Peyvənd olunanların səhhəti normaldır, heç bir əks təsir müşahidə edilməyib.
Onu da qeyd edək ki, tibb müəssisəsində 130 həkim və tibb işçisi çalışır. Onların 14 nəfəri müxtəlif vaxtlarda yeni növ koronavirus (COVID-19) infeksiyasına yoluxub və sağalıb. Növbəti günlərdə qalan həkim və tibb işçiləri də vaksinasiyadan keçəcəklər.
Bölmənin digər xəbərləri
