Polşa hökuməti İsrailin üzr istəməsini gözləyir
Varşava, 20 fevral, AZƏRTAC
İsrailin xarici işlər naziri səlahiyyətlərini icra edən İsrael Kas ölkəsinin “13-cü kanal”na müsahibəsində Polşadakı yəhudilərin qətliamında polşalıların nasistlərlə əlbir olduqlarını iddia edib.
AZƏRTAC xəbər verir ki, daha əvvəl İsrailin Baş naziri Benyamin Netanyahu da Polşada səfərdə olarkən oxşar ittihamlar səsləndirmişdi və bu səbəbdən Polşanın Baş naziri Mateuş Moraveskiy İsraildə keçiriləcək beynəlxalq sammitdə iştirak etməyəcəyini bildirmişdi. Baş nazirin dəftərxanasının rəsmi açıqlamasında bildirilir ki, Polşa İsraildə keçiriləcək Vişeqrad sammitində yalnız xarici işlər naziri səviyyəsində təmsil oluna bilər.
Polşanın xarici işlər nazirinin müavini Şimon Şinkovski isə İsraildən rəsmi açıqlama və üzr gözlədiklərini deyib.
“Vesti” agentliyinin məlumatına görə isə, Polşa prezidenti Andjey Duda da Vişeqrad sammitinin digər iştirakçıları olan Çexiya, Slovakiya və Macarıstanı tədbirin İsraildə keçirilməsini boykot etməyə çağırıb.
Aygün Əliyeva
AZƏRTAC-ın xüsusi müxbiri
Varşava
Bölmənin digər xəbərləri
