Polşanın Baş naziri: Aİ real çağırışlar əvəzinə, xəyali problemlərə köklənib
Varşava, 30 oktyabr, AZƏRTAC
Avropa İttifaqı (Aİ) real çağırışlar əvəzinə, xəyali problemlərə köklənib.
AZƏRTAC xəbər verir ki, bunu Polşanın Baş naziri Mateuş Moravietski ölkəsinin hazırda Aİ institutları ilə gərginliyini şərh edərkən bildirib. “Polşa Avropa İttifaqını tərk etmir” sərlövhəli məqaləsində Baş nazir Aİ ilə hüquqi dövlətçilik mübahisəsində ölkəsinin mövqeyini açıqlayıb. Eyni zamanda, o, yaranmış gərginliyin Polşa hökumətinin ölkəni Aİ üzvlüyündən çıxarmaq üçün gizli planı olmasına dair fərziyyələri də təkzib edib.
Xatırladaq ki, milli qanunvericiliyin Avropa qanunlarından üstün tutulmasına dair Polşa Konstitusiya Məhkəməsinin qərarından sonra Aİ və Polşa arasında hüquqi müstəvidə gərginlik kəskinləşib. Avropa Komissiyası müvafiq dəyişikliklər edilməyəcəyi təqdirdə, Polşanı pandemiyadan sonrakı inkişaf fondundan ayrılacaq yardımlardan məhrum etməklə hədələyib.
Lakin M. Moriavetski məqaləsində yazıb ki, Polşa Aİ-dən çıxmaq niyyətində deyil. Amma Brüsseldən “öz fikirlərini müdafiə edən” üzv dövlətləri qorxutmaq və cəzalandırmaqdan əl çəkməsini istəyir.
Elgün Niftəli
AZƏRTAC-ın xüsusi müxbiri
Varşava
Bölmənin digər xəbərləri
