Praqa cinayət törətmiş qaçqınların deportasiya olunmasını istəyir
Praqa, 9 yanvar, AZƏRTAC
ÇTK agentliyinin verdiyi xəbərə görə, Çexiyanın Baş naziri Boquslav Sobotka mətbuat üçün məlumatında bildirib ki, cinayət törətmiş qaçqınlar avtomatik surətdə Avropa İttifaqından deportasiya olunmalıdırlar. Baş nazir qaçqınların cəmiyyətə inteqrasiyasının zəruri olduğunu da vurğulayıb.
Çexiya hökumətinin sədri belə bir bəyanatla Almaniyada Yeni il gecəsi baş verən zorakılıq hallarının araşdırıldığı hadisələr fonunda çıxış edib. Şahidlərin sözlərinə görə, Kölndə və başqa şəhərlərdə, çox güman, miqrant olan kişilər Yeni il bayramını küçədə qeyd edən qadınlara seksual xarakterli hücumlar ediblər. Boquslav Sobotka vurğulayıb: “Almaniya şəhərlərində son hadisələr miqrasiya böhranın həllində təhlükəsizlik və inteqrasiya kimi aspektlərin necə əhəmiyyətli olduğunu göstərir”. O, daha sonra əminliklə qeyd edib: “Aİ-nin xarici sərhədlərinin müdafiə olunmasına, habelə qaçqınların sığınacaq istədikləri ölkələrin qayda-qanunlarına əməl etmələrinə bundan sonra da israrla nail olmaq lazımdır. Təklif edilən köməyi qiymətləndirməyən, qaydaları pozan və hətta cinayət törədən hər kəs avtomatik surətdə Aİ-dən çıxarılmalıdır”.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
