Bakı, 10 may, Ayla Aktar, AZƏRTAC

Ümummilli Lider Heydər Əliyevin 100 illik yubileyi ərəfəsində Prezident İlham Əliyev 801 nəfər barəsində əfv sərəncamı imzalayıb. Bu, əfv olunanlarla yanaşı, onların ailələrinin, sevdiklərinin də sevincinə səbəb olub. Heç şübhə yoxdur ki, Prezident İlham Əliyev humanist siyasəti ilə xalqının sevgisini qazanan liderdir.

Bu sözləri AZƏRTAC-a açıqlamasında Sosial və İnnovativ İnkişaf İctimai Birliyinin sədri Taleh Mansurov deyib.

Bildirib ki, Sərəncama əsasən 801 məhkum əfv olunub, onlardan 463 şəxs azadlıqdan məhrumetmə cəzasından, 220 şəxs azadlıqdan məhrumetmə cəzasının çəkilməmiş hissəsinin yarısından, 118 nəfər azadlıqdan məhrumetmə ilə bağlı olmayan digər cəzalardan (azadlığın məhdudlaşdırılması, islah işləri, cərimə cəzaları və cəzaya şərti məhkum edilmiş şəxslər) azad edilib.

“Sirr deyil ki, bu Sərəncam şamil edildiyi şəxslərin dairəsinə görə müstəqil Azərbaycan Respublikasının tarixində qəbul edilmiş ən böyük əfv aktıdır. Bununla yanaşı, onu da qeyd etmək istəyirəm ki, 100 illik yubileyini qeyd edəcəyimiz, əbədiyaşar lider Heydər Əliyevin ölkəmizə rəhbərlik etdiyi dövrdə 1993-2003-cü illərdə 7 amnistiya aktı qəbul edilib və 32 əfv Sərəncamı imzalanıb. Bu amnistiya aktları 77 mindən çox insana şamil edilib. Ulu Öndər tərəfindən imzalanan əfv sərəncamları ilə 3 mindən çox şəxs bağışlanaraq cəzalarından azad edilib. Ümummilli Lider, həmçinin böyük humanistlik nümayiş etdirərək imzaladığı əfv fərmanları ilə 1994-1995-ci illərdə dövlət çevrilişi cəhdlərində iştirak edən insanların da bir qismini bağışlayıb. Məhz Ulu Öndər Heydər Əliyevin humanizminin nəticəsi olaraq ölkəmizdə ölüm hökmü aradan qaldırılıb və Azərbaycanın adı Şərqdə ilk olaraq bu cəzanı ləğv edən ölkə kimi tarixə düşüb. Ümummilli Liderin siyasi varisi Prezident İlham Əliyevin idarəçiliyi dövründə də Azərbaycan xalqı eyni siyasətin yürüdüldüyünün şahididir. Heç təsadüfi də deyil ki, bu günlərdə həmin irsə sadiq qalan Prezident İlham Əliyev bir daha humanizm prinsiplərini əsas tutaraq müstəqil Azərbaycanın ən böyük əfv Sərəncamını imzalayıb", - deyə T.Mansurov bildirib.