Prezident Rəcəb Tayyib Ərdoğan: Türkiyədən qəti şəkildə güzəşt gözləməsinlər
Ankara, 25 iyul, AZƏRTAC
Nə qədər ki, ölkəmizə qarşı fəaliyyət göstərən terror təşkilatının fəaliyyətlərinin qarşısını almayacaqlar, bizdən müsbət yanaşma gözləməməlidirlər.
AZƏRTAC xəbər verir ki, bu sözləri Türkiyə Prezidenti Rəcəb Tayyib Ərdoğan iyulun 25-də “TRT Haber” telekanalının canlı yayımında İsveç və Finlandiyanın NATO-ya üzvlük məsələlərini dəyərləndirərkən söyləyib.
Tərəflərin götürdükləri öhdəliyi mütləq yerinə yetirməli olduqlarını xatırladan Prezident Rəcəb Tayyib Ərdoğan təəssüf hissi ilə bildirib ki, Türkiyəyə qarşı fəaliyyət göstərən terror təşkilatlarını bu və ya digər formada dəstəkləmək və ya onların fəaliyyətinə göz yummaq bir sıra digər Avropa ölkələrində də mövcuddur.
Xatırladaq ki, İsveçin Ankaradakı səfirliyinin müvəqqəti işlər vəkili iyulun 23-də Türkiyə Xarici İşlər Nazirliyinə çağırılıb və ona PKK/YPG terror təşkilatlarının fəaliyyəti ilə bağlı kəskin etiraz ifadə edilib. Qarşı tərəfdən PKK/YPG terror təşkilatı tərəfdarlarının iyulun 21-də İsveçin Göteborq şəhərində həyata keçirdiyi aksiya ilə bağlı izahat istənilib.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
