Gürcüstanda “Yeni tanışlıqlar və xoş xatirələr” adlı yay düşərgəsi başlanıb
Tbilisi, 17 avqust, AZƏRTAC
Gürcüstanın Qurcaani rayonunun Qaçreti qəsəbəsində “Parlaq gələcək” kitab evinin təşkilatçılığı ilə “Gürcüstanlı gənclərin yeni tanışlıqları və xoş xatirələr” adlı yay düşərgəsi başlanıb.
AZƏRTAC xəbər verir ki, yay düşərgəsi Azərbaycan Respublikasının Diasporla İş üzrə Dövlət Komitəsinin dəstəyi və layihələri çərçivəsində reallaşıb.
Tədbir iştirakçıları əvvəlcə Tbilisidəki Heydər Əliyev Parkında Azərbaycan xalqının Ümummilli Liderinin büstü önünə əklil və güllər dəstələri düzüb, xatirəsini ehtiramla yad ediblər.
Avqustun 17-dən 20-dək davam edəcək düşərgənin əsas məqsədi Gürcüstanda yaşayan azərbaycanlı və gürcü gənclərin bir araya gəlməsinə, onların milli-mədəni dəyərlərimizi daha yaxından tanımasına, dünyagörüşünün genişlənməsinə, yeni dostluq münasibətlərinin qurulmasına və asudə vaxtlarının səmərəli təşkilinə şərait yaratmaqdır.
Açılış mərasimində təşkilatçı Rafail Süleymanov gənclərin düşərgə müddətində yeni bilik və bacarıqlar əldə edəcəklərinə, buradan xoş xatirə və zəngin təəssüratla ayrılacaqlarına əminliyini ifadə edib.
Diasporla İş üzrə Dövlət Komitəsinin məsul əməkdaşı Sabit Məmmədov bu cür layihələrin gənclərin milli kimliyinin, həmrəylik və birlik duyğularının möhkəmləndirilməsi baxımından əhəmiyyətini qeyd edib.
S.Məmmədov Azərbaycan dövlətinin xaricdə yaşayan soydaşlarımıza, xüsusilə də gənclərə göstərdiyi diqqət və qayğıdan bəhs edib. Bildirib ki, Prezident İlham Əliyevin diaspor siyasətinə göstərdiyi xüsusi diqqət və qayğı nəticəsində müxtəlif ölkələrdəki soydaşlarımızın Azərbaycanla əlaqələrinin möhkəmləndirilməsi, mədəni irsinin qorunması, gənc nəslin azərbaycançılıq ideyaları ətrafında birləşməsi istiqamətində mühüm layihələr həyata keçirilir. O, Gürcüstanda yaşayan azərbaycanlıların da Azərbaycan diaspor siyasətində mühüm yer tutduğunu, burada yaşayan soydaşlarımızın öz ana dilini, milli-mənəvi dəyərlərini, adət-ənənələrini qoruyub-yaşatmasının böyük əhəmiyyət daşıdığını vurğulayıb.
Komitənin məsul əməkdaşı Elvin Əsgərov yay düşərgələrinin gənclərin inkişafında, onların bir-birini daha yaxından tanımasında, milli-mənəvi dəyərlərə bağlılığının gücləndirilməsində mühüm rol oynadığını bildirib.
Yor-Muğanlı İctimai Məktəbinin müəllimi Ekaterine Kaftuaşvili qeyd edib ki, belə düşərgələr və gənclər arasında keçirilən birgə tədbirlər Azərbaycan və gürcü xalqları arasında dostluq münasibətlərinin, xüsusilə də gənc nəsil arasında qarşılıqlı anlaşma və hörmətin daha da dərinləşməsinə töhfə verəcək.
Daha sonra İsmixan Məmmədovun rəhbərliyi ilə iştirakçılara komanda halında işləmək, əməkdaşlıq etmək və birgə qərar qəbul etmək bacarıqlarının inkişafına yönəlmiş təlim keçirilib.
Bununla yanaşı, iştirakçıların Azərbaycan tarixi, milli-mədəni irsi və ümumi dünyagörüşü üzrə biliklərini yoxlamaq və zənginləşdirmək məqsədilə intellektual oyunlar təşkil olunub.
Düşərgə müxtəlif maarifləndirici görüşlər, komanda oyunları, intellektual yarışlar, mədəni proqramlar və gənclərin asudə vaxtının səmərəli təşkilinə yönəlmiş fəaliyyətlərlə davam edəcək.
Bölmənin digər xəbərləri
