Professor Anar İsgəndərovun anadan olmasının 70 illik yubileyinə həsr edilən tədbir keçirilib
Bakı, 10 yanvar, AZƏRTAC
Yanvarın 10-da Milli Kitabxanada Milli Məclisin Elm və təhsil komitəsinin sədri, görkəmli tarixçi-alim, professor Anar İsgəndərovun anadan olmasının 70 illik yubileyinə həsr edilən tədbir təşkil olunub.
Bu barədə AZƏRTAC-a Milli Kitabxanadan məlumat verilib.
Bildirilib ki, tədbirdə əvvəlcə “Görkəmli tarixçi- alim, professor Anar İsgəndərov” adlı ənənəvi və elektron virtual sərgi iştirakçılara təqdim edilib.
Tədbirdə çıxış edən Milli Kitabxananın direktoru, professor Kərim Tahirov A. İsgəndərovu respublikamızın ictimai-siyasi həyatında səmərəli fəaliyyətinə görə ölkəmizin ən böyük mükafatlarından biri olan “Şöhrət” ordeni ilə təltif etdiyinə görə Prezident İlham Əliyevə iştirakçılar adından təşəkkürünü bildirib.
Sonra A. İsgəndərovun çoxşaxəli fəaliyyətindən danışan direktor onun Milli Məclisin Elm və təhsil komitəsinin sədri kimi bu sahənin normativ-hüquqi bazasının yaradılması istiqamətində Prezidentin qanunvericilik təşəbbüsu ilə təqdim etdiyi normativ sənədlərin geniş müzakirəsi və parlament tərəfindən qəbul olunmasındakı xidmətlərindən danışıb. Həmçinin Azərbaycanda tarix elminin inkişafına verdiyi töhfələrdən, Bakı Dövlət Universitetində (BDU) kafedra müdiri kimi gənc tarixçi kadrların hazırlanmasındakı rolundan, Ali Attestasiya Komissiyasında (AAK) Tarix elmləri üzrə Ekspert Şurasının sədri kimi gənc tarixçi alimlərin elmin zirvələrinə irəliləmələrinə dəstək verməsindən, Xalq Cümhuriyyətinin və 1918-ci il mart qırğınlarının ilk tədqiqatçılarından olmasından bəhs edib.
Milli Məclisin üzvü, professor Bəxtiyar Əliyev isə 50 ildən artıq yubilyarla BDU-da birgə çalışdıqlarını qeyd edərək, onun çox təvazökar və istedadlı alim kimi geniş spektrli elmi yaradıcılığından, kafedra müdiri kimi yorulmaq bilmədən gənc kadrların yetişdirilməsində fədakar fəaliyyətindən, eləcə də bir insan, dost və həmkar kimi şəxsi keyfiyyətlərindən danışıb.
Deputatlar Elçin Mirzəbəyli, Samir Vəliyev və Vasif Qafarov da Milli Məclisdə Elm və təhsil komitəsinin sədri kimi A. İsgəndərovla birgə fəaliyyətlərindən və onun komitə sədri kimi bütün qanunvericilik aktlarının müzakirəsində fəal iştirakından, müzakirələrin elm və təhsil ekspertlərinin, əlaqədar təşkilatların nümayəndələrinin iştirakı ilə ciddi müzakirə şəraitində keçirilməsindən söz açıblar. Eyni zamanda, onu çoxşaxəli fəaliyyət göstərən alim, dost və iş yoldaşı kimi dəyərləndiriblər.
Qafqaz Müsəlmanları İdarəsinin sədr müavini Qəmər Cavadlı A. İsgəndərova şeyxülislam Hacı Allahşükür Paşazadənin təbrikini çatdırıb. Həmçinin onun Elmi-Dini Şuranın üzvü kimi yorulmaz və səmərəli fəaliyyətindən bəhs edib.
BDU-nun Tarix fakültəsinin dekanı İbrahim Zeynalov, AAK-nın Tarix elmləri üzrə Ekspert Şurasının üzvü Şikar Qasımov, fəlsəfə elmləri doktoru Dilqəm İsmayılov, Azərbaycan Milli Elmlər Akademiyasının (AMEA) Etnoqrafiya İnstitutunun direktoru Fərhaq Quliyev, filologiya elmləri doktoru Yeganə İsmayılova, tarix üzrə fəlsəfə doktoru Firdovsiyyə Əhmədova, AMEA-nın Arxeologiya və Antropologiya İnstitutunun Daş dövrü arxeologiyası şöbəsinin müdiri Əsədulla Cəfərov və digərləri də A. İsgəndərovun çoxşaxəli elmi yaradıcılığından və uğurlarından danışıblar.
Tədbirin sonunda A. İsgəndərov onu respublikanın ictimai-siyasi həyatında səmərəli fəaliyyətinə görə yüksək mükafatla təltif etdiyi üçün Prezident İlham Əliyevə təşəkkürünü bildirib. Həmçinin tədbirin yüksək səviyyədə təşkilinə görə Milli Kitabxananın rəhbərliyinə, eləcə də çıxış edənlərə və iştirakçılara təşəkkür edib.
Bölmənin digər xəbərləri
