Pul tələbi borclunun əməkhaqqı məbləğinin yarısından çox ola bilməz
Bakı, 12 yanvar, Günel Türksoy, AZƏRTAC
Tələbin borclunun əməkhaqqına və digər gəlirlərinə yönəldilməsi ilə bağlı məsələlər "İcra haqqında" Qanunun 63-cü maddəsi ilə tənzimlənir. Qanunvericiliyə əsasən, vaxtaşırı ödəmələrin tutulması haqqında icra sənədləri icra edildikdə, tələb üzrə tutulmalı olan məbləğin həcmi bu Qanunun 65-ci maddəsində müəyyən edilmiş miqdardan artıq olmadıqda, tələbin tam ödənilməsi üçün borclunun əmlakı olmadıqda və ya onun əmlakı kifayət etmədikdə tələb borclunun əməkhaqqına və digər gəlirlərinə yönəldilir.
Bu barədə AZƏRTAC-ın sorğusuna cavab olaraq Ədliyyə Nazirliyinin mətbuat xidmətindən məlumat verilib.
Bildirilib ki, Qanunun 65.1-ci maddəsinə əsasən, icra sənədi icra edilərkən borclunun əməkhaqqından və ona bərabər sayılan digər gəlirlərindən tutmaların məbləği 50 faizdən çox ola bilməz. Lakin bəzi hallar istisnadır. Belə ki, alimentlərin tutulması, sağlamlığa vurulmuş ziyanın ödənilməsi, ailəni dolandıranın itkisi nəticəsində zərər çəkmiş şəxslərə vurulmuş ziyanın ödənilməsi və cinayət nəticəsində vurulmuş ziyanın ödənilməsi zamanı isə əməkhaqqından və ona bərabər sayılan digər gəlirlərdən tutmaların məbləği 70 faizdən çox ola bilməz.
Bölmənin digər xəbərləri
