QANUNSUZ SİLAHLI BİRLƏŞMƏLƏRDƏ İŞTİRAK EDƏNLƏRİN MÜHAKİMƏSİ BAŞLANMIŞDIR

29.09.2004 [17:09]
Çap et
A⁺ A^-

AZƏRTAC xəbər verir ki, sentyabrın 29-da Bakıda, Ağır Cinayətlərə Dair Respublika Məhkəməsində qanunsuz silahlı dəstələr yaradılmasında və belə dəstələrdə iştirakda, habelə silah qaçaqmalçılığında və qanunsuz silah saxlamaqda ittiham edilən 21 nəfərdən ibarət qrupun işi ilə bağlı məhkəmə prosesi başlanmışdır.

İstintaq materiallarına əsasən, qrupun başçısı Rövşən Bədəlov Çeçenistanda hərbi əməliyyatlarda iştirak etmiş, Gürcüstan ərazisində xüsusi düşərgədə hazırlıq keçmiş, sonra qanunsuz dəstə yaratmışdır. O, Azərbaycanın Türkiyə və Rusiya ilə dövlət sərhədini bir neçə dəfə qanunsuz keçməkdə də təqsirləndirilir. İttiham olunanların 20 nəfəri Azərbaycan, biri isə Gürcüstan vətəndaşıdır.

Müttəhimlər özlərini təqsirkar hesab etmirlər. İttihamlar sübut edilərsə, onları 3 ildən 8 ilə qədər həbs cəzası gözləyir.

Məhkəmə prosesi davam edir.