“Qarabağ”ın futbolçusu: Hər kəs nəyə qadir olduğumuzu gördü
Bakı, 27 may, AZƏRTAC
“Bilirsiniz ki, çempion olmaq mükəmməl hissdir. Hamımız çox xoşbəxtik”.
Bu sözləri AZƏRTAC-a açıqlamasında Azərbaycan Premyer Liqasında 2023-2024-cü illər mövsümünün qalibi olan “Qarabağ” klubunun futbolçusu Kevin Medina mükafatlandırma mərasimindən sonra deyib.
Kolumbiyalı müdafiəçi bildirib ki, çempionluq kubokunu qaldıranda mövsümün başlanğıcı yadına düşüb: “O an fikirləşdim ki, bu uğuru necə çətinliklə qazanmışıq. Həmin günlər sanki film kimi gözümün önündən keçdi. Birinci turun ilk oyunundan etibarən çox əziyyət çəkdik. Bunun qarşılığını aldığımız üçün sevinirəm. Hər kəs bizim nəyə qadir olduğumuzun şahidi oldu. Qələbəyə görə, sadəcə, xoşbəxt olduğumu deyə bilərəm”.
31 yaşlı oyunçu növbəti hədəfləri ilə bağlı indidən düşünmək istəmədiyini bildirib: “Əslində, bu barədə fikirləşməmişəm. Bir idmançı nə qədər uğur əldə etsə də, həmişə daha artığını istəyir. Hazırda bu anı yaşamaq istəyirəm. Fikrimcə, bu barədə düşünmək üçün hələ çox zamanım olacaq”.
Qeyd edək ki, “Qarabağ” 83 xalla bu mövsüm tarixində 11-ci dəfə Azərbaycan çempionu olub.
Bölmənin digər xəbərləri
