QAXDA “KUNQ-FU SANDA” ÜZRƏ RESPUBLİKA ÇEMPİONATI KEÇİRİLMİŞDİR
Qax, 27 iyun (AZƏRTAC). Qax şəhər stadionunda yeniyetmələr arasında “Kunq-fu sanda” idman növü üzrə Azərbaycan çempionatı keçirilmişdir. Çempionatda respublikanın ayrı-ayrı şəhər və rayonlarını təmsil edən 22 komandanın tərkibində 112 idmançı mübarizə aparmışdır.
Yarışların rəsmi açılış mərasimində Qax rayon İcra hakimiyyətinin başçısı Mübariz Əhmədzadə, Respublika Kunq-fu Federasiyasının prezidenti Barat İsrafilov, Gənclər və İdman Nazirliyinin məsul nümayəndəsi Aydın Məmmədov və nazirliyin yerli qurumunun rəhbəri Əlövsət Bayramov çıxış edərək yarış iştirakçılarına uğurlar arzulamışlar.
Sonra yarışlara start verilmişdir. İdmançılar 22 çəki dərəcəsi üzrə mübarizə aparmışlar. Bakının “Zirvə” komandasının yetirmələri daha uğurlu çıxış edərək, yarışları 1-ci pillədə başa vurmuşlar. Sonrakı yerləri Mingəçevir və Ağdam təmsilçiləri tutmuşlar.
Qalib komandalara Kunq-fu Federasiyasının mükafatları təqdim olunmuşdur.
Bölmənin digər xəbərləri
