CƏMİYYƏT
Qəbələnin səhiyyə işçilərinə fəxri fərman və qiymətli hədiyyələr verilmişdir
Qəbələ, 17 iyun (AZƏRTAC). Qəbələdə səhiyyə işçilərinin peşə bayramı təntənə ilə qeyd edilmişdir.
AZƏRTAC xəbər verir ki, rayonun tibb işçiləri əvvəlcə ulu öndər Heydər Əliyevin abidəsini ziyarət etmiş, önünə tər gül-çiçək dəstələri qoymuşlar.
Rayon mərkəzi xəstəxanasında və Müalicə-Diaqnostika Mərkəzində keçirilən bayram tədbirlərində dövlətin səhiyyəyə olan diqqət və qayğısından danışılmışdır. Qeyd edilmişdir ki, ölkəmizdə səhiyyə işçilərinin peşə bayramı günü ulu öndərimiz Heydər Əliyevin 2001-ci il 4 iyun tarixli Sərəncamı ilə təsis olunmuşdur.
Qeyd edilmişdir ki, bu gün səhiyyənin inkişafı dövlətimizin başçısı İlham Əliyevin həyata keçirdiyi sosial-iqtisadi siyasətin mühüm tərkib hissəsidir. Paytaxtla yanaşı, bölgələrdə də yeni xəstəxana binalarının inşası, müasir diaqnostika mərkəzlərinin və özəl klinikaların açılması, onların müasir tibbi avadanlıqla təmin edilməsi dövlətin bu sahəyə olan qayğısının nəticəsidir.
İşində fərqlənən bir qrup tibb işçisinə rayon icra hakimiyyətinin fəxri fərmanları və qiymətli hədiyyələr verilmişdir.