QƏDİM ŞƏHƏR HAQQINDA SƏNƏDLİ FİLM
“Azərbaycanfilm” kinostudiyasında “Şabran” sənədli filminin çəkilişi başa çatmışdır. Filmdə əsası eramızın IY əsrinin ortalarında qoyulmuş, indiki Dəvəçi rayonunun ərazisində, Bakının 130-150 kilometrliyində yerləşən qədim Azərbaycan şəhərindən söhbət açılır. Milli Elmlər Akademiyası Arxeologiya və Etnoqrafiya İnstitutunun bir qrup alimi 1979-cu ildən burada qazıntı işləri aparır. Bu müddətdə aşkar edilmiş məişət və bəzək əşyaları hələ V əsrdə Şabranda dulusçuluğun, şüşəçiliyin, gümüş və digər metalların emalının, ipəkçiliyin inkişaf etdiyini göstərir. O vaxtlar Məkkəyə, Mədinəyə, Təbrizə, İsfahana və digər şəhərlərə gedən karvan yolları buradan keçirdi.
Şabran uzaq ölkələrlə, o cümlədən Çinlə də sıx ticarət-iqtisadi əlaqələr saxlayırdı. Filmdə haqqında söhbət gedən bir çox eksponatlar hazırda Dəvəçi Diyarşünaslıq muzeyində saxlanılır.
Məhşur Norveç səyyahı Tur Heyerdal da 1982-ci ildə Bakıda olarkən Şabranda qazıntılar zamanı tapılmış məişət və bəzək əşyalarını yüksək qiymətləndirmişdir.
Bölmənin digər xəbərləri
