“Qələbədən Zəfərə Türk dünyasının keçdiyi tarixi yol”- elmi konfrans
Bakı, 17 aprel, AZƏRTAC
AMEA-nın Tarix və Etnologiya İnstitutunun Türk xalqlarının tarixi və etnologiyası şöbəsinin və Qazaxıstanın “Atamın əmanəti” İctimai Təşkilatının birgə təşkilatçılığı ilə “Qələbədən Zəfərə Türk dünyasının keçdiyi tarixi yol” mövzusunda beynəlxalq elmi konfrans keçirilib.
İnstitutdan AZƏRTAC-a bildirilib ki, Azərbaycan və Qazaxıstanın alim, veteran və ictimai xadimlərinin iştirakı ilə keçirilən tədbir İkinci Dünya müharibəsində faşizm üzərində qələbənin 80 illiyinə, Vətən müharibəsində Zəfərin 5 illiyinə həsr olunub.
Tədbirin moderatoru Tarix və Etnologiya İnstitutunun elmi işlər üzrə direktor müavini dosent İlqar Niftəliyev beynəlxalq konfransda “Azərbaycanda müharibənin xatirəsi və nəsillərin varisliyi” mövzusunda çıxış edib.
Sonra Türk xalqlarının tarixi və etnologiyası şöbəsinin müdiri dosent Güllü Yoloğlunun “Qələbədən Zəfərə dəyişən Türk dünyası” mövzusunda çıxışı dinlənilib.
“Atamın əmanəti” İctimai Təşkilatının həmtəsisçisi, Rusiya Avrasiya Xalqları Assambleyasının Nəsil Mədəniyyəti Komitəsinin həmsədri, hüquqşünas Aliyə Saqımbayeva “Müharibənin uzunmüddətli sosial-psixoloji nəticələrinin nəsillərin davranış modelinə təsiri” mövzusunda danışıb.
Qazaxıstanda fəaliyyət göstərən Qarabağ Müharibəsi Veteranları Birliyinin Astana şəhəri üzrə təşkilatının sədri Yerjan Aytıkov tədbirə onlayn qoşularaq təəssüratlarını bölüşüb.
“Atamın əmanəti” İctimai Təşkilatının həmtəsisçisi Musina Saule “1941-1945-ci illər müharibəsində itkin düşmüş babaların axtarışı və RMK-nın psixotexnologiyası”, filoloq, telejurnalist, Mustafa Şokay nəslinin davamçısı Qulbarşın Zairova “Mustafa Şokayın sovet təbliğatına qarşı mübarizəsi” mövzusunda çıxış ediblər. Rusiya Federasiyası Beynəlxalq Elmlər Akademiyasının ekologiya və bioresurslar üzrə müxbir üzvü, Azərbaycan Yazıçılar Birliyinin fəxri üzvü, Qazaxıstan və Azərbaycan Jurnalistlər birliklərinin üzvü Kenjina Nasixa “Qarabağ bir qazaxıstanlı qadının gözü ilə” mövzusunda danışıb.
Tarix və Etnologiya İnstitutunun Azərbaycanın sovet dövrü tarixi şöbəsinin aparıcı elmi işçisi dosent Raisa Cəfərovanın “ALJİR”də məhbus həyatı yaşamış azərbaycanlı qadınlar”, Qərbi Azərbaycan tarix” şöbəsinin müdiri dosent Cəbi Bəhramovun “1941-1945-ci illər müharibəsində alman faşizmi üzərindəki qələbədə Azərbaycan xalqının töhfəsi”, BDU-nun doktorantı Xəyalə Şabanovanın “Azərbaycan legionunun 1941-1945-ci illər müharibəsindəki fəaliyyəti” mövzusunda məruzələri dinlənilib.
Bölmənin digər xəbərləri
