Xorvatiyalı idmançı: Son kilometrdə maksimum güc sərf edərək finişə birinci çatdım
Bakı, 5 sentyabr, AZƏRTAC
Bu mənim karyeramdakı ən yaxşı yarışım olmadı, amma finiş xəttinə qədər var gücümlə mübarizə apardım.
AZƏRTAC xəbər verir ki, bu sözləri Bakının ev sahibliyi etdiyi “IRONMAN 70.3” beynəlxalq triatlon yarışında finiş xəttini birinci keçən idmançı Matey Jukiç deyib.
Qələbədən sonra təəssüratlarını bölüşən Xorvatiya təmsilçisi Bakıda özünü möhtəşəm hiss etdiyini bildirib: “Bu gözəl yarışı təşkil etdiyiniz üçün təşəkkür edirəm, Bakıda özümü əla hiss etdim. Yanımda olan yaxın dostum mənə vaxtı deyirdi. Son kilometrdə mənə bildirdi ki, finişə qədər maksimum təzyiq göstərməli və sürəti artırmalıyam. Mən də onun sözünə əməl etdim və nəticədə cəmi 1 saniyə fərqlə qələbə qazandım".
Qeyd edək ki, yarışa 62 ölkədən 1500-dən çox iştirakçı qatılıb. “IRONMAN 70.3 Baku” yarışında kişi və qadınlar arasında ən yaxşı nəticə göstərən 25 idmançı 2027-ci ildə ABŞ-də keçiriləcək “IRONMAN 70.3” triatlon üzrə dünya çempionatına vəsiqə qazanacaq. Xatırladaq ki, yarış Gənclər və İdman Nazirliyi, Azərbaycan Triatlon Federasiyası və Bakı Şəhər Halqası Əməliyyat Şirkətinin təşkilatçılığı ilə keçirilir.
Bölmənin digər xəbərləri
