Qərbi Azərbaycanın tarixi abidələrinin təbliği məqsədilə layihə-müsabiqə elan olunub
Bakı, 13 may, AZƏRTAC
“2026-cı il Azərbaycanda Şəhərsalma və Memarlıq İli” çərçivəsində Qərbi Azərbaycan İcmasının təşkilatçılığı ilə “Qərbi Azərbaycanın tarixi abidələri: məktəblilərin gözü ilə” layihə-müsabiqəsinin elan olunmasına həsr edilmiş mətbuat konfransı keçirilib.
AZƏRTAC xəbər verir ki, konfransda Qərbi Azərbaycan İcmasının nümayəndələri, media təmsilçiləri və layihənin tərəfdaş qurumlarının nümayəndələri iştirak ediblər.
Tədbiri giriş sözü ilə açan Milli Məclisin deputatı, Qərbi Azərbaycan İcmasının sədri Əziz Ələkbərli bildirib ki, qarşıda duran əsas vəzifələrdən biri milli-mənəvi dəyərlərimizə, tarixi irsimizə və xalqımıza məxsus bütün maddi-mədəni sərvətlərə sahib çıxmaqdır.
“Qərbi Azərbaycanın tarixi, mədəniyyəti və zəngin irsinin qorunması, gələcək nəsillərə çatdırılması mühüm əhəmiyyət daşıyır. Biz yalnız tariximizi öyrənməməli, eyni zamanda, onu qorumalı və təbliğ etməliyik. Milli yaddaşın yaşadılması, tarixi həqiqətlərin gənc nəslə çatdırılması bu istiqamətdə həyata keçirilən fəaliyyətin əsas məqsədlərindəndir”, – deyə Ə.Ələkbərli vurğulayıb.
Qərbi Azərbaycan İcmasının sədri qeyd edib ki, bu kimi layihələr məktəblilərin milli irsə marağının artırılması, onların tarixə bağlı ruhda yetişdirilməsi baxımından xüsusi əhəmiyyət daşıyır.
Qərbi Azərbaycan İcmasının Qadınlar Şurasının sədri, Milli Məclisin deputatı Məlahət İbrahimqızı layihə barədə məlumat verərək bildirib ki, layihənin bölgələrdə keçiriləcək birinci mərhələsində İcmanın rayonlarda fəaliyyət göstərən nümayəndəlikləri də iştirak edəcəklər.
Onun sözlərinə görə, layihə-müsabiqənin ölkənin 13 bölgəsi üzrə ümumtəhsil məktəblərinin istedadlı şagirdləri arasında keçirilməsi nəzərdə tutulur.
“Layihə iştirakçılar arasında Qərbi Azərbaycanda yerləşən tarixi irs barədə məlumatlılığın artırılmasına, tarixi yaddaşın möhkəmləndirilməsinə, eyni zamanda gələcəkdə həmin abidələrin bərpası və təbliği istiqamətində yaradıcı və analitik düşüncə bacarıqlarının formalaşdırılmasına mühüm töhfə verəcək”, – deyə deputat bildirib.
Qeyd olunub ki, layihə iki mərhələdən ibarət olacaq. Hər iki turun qiymətləndirilməsi müvafiq ixtisaslı ekspertlərdən ibarət münsiflər heyəti tərəfindən aparılacaq. Birinci turun nəticələri bölgələr üzrə qiymətləndirildikdən sonra seçilmiş işlər final mərhələsinə təqdim ediləcək. Layihənin final mərhələsinin 2026-cı ilin dekabr ayında keçirilməsi nəzərdə tutulur.
Konfransda çıxış edənlər vurğulayıblar ki, müsabiqə çərçivəsində məktəblilər Qərbi Azərbaycanın tarixi abidələrini müxtəlif yaradıcılıq istiqamətləri üzrə təqdim edəcəklər. Layihənin gənclərin tarixə və milli-mədəni irsə bağlılığının gücləndirilməsi baxımından mühüm əhəmiyyət daşıdığı diqqətə çatdırılıb.
Tədbirdə layihənin şərtləri, iştirak qaydaları və qiymətləndirmə meyarları barədə ətraflı məlumat verilib, media nümayəndələrinin sualları cavablandırılıb.
Bölmənin digər xəbərləri
